اسلام آباد،(سب نیوز)اسلام آباد میں آسیان کمیٹی نے آسیان کے 59ویں یومِ تاسیس کے موقع پر مشترکہ بیان جاری کرتے ہوئے خطے میں امن، استحکام، خوشحالی اور باہمی تعاون کے فروغ کے عزم کا اعادہ کیا ہے۔آسیان کمیٹی نے اپنے بیان میں کہا کہ 8 اگست 1967 کو بینکاک میں آسیان کے بانی ممالک نے آسیان اعلامیے پر دستخط کیے، جس کے بعد تنظیم نے تقریبا چھ دہائیوں میں ایک متحرک اور بااثر علاقائی تنظیم کی حیثیت حاصل کی ہے۔بیان میں آسیان کمیونٹی وژن 2045 کے نفاذ کے پہلے سال اور جنوب مشرقی ایشیا میں معاہدہ دوستی و تعاون کی 50ویں سالگرہ کو بھی اہم سنگِ میل قرار دیا گیا۔
کمیٹی نے کہا کہ باہمی احترام، پرامن تنازعات کے حل، عدم مداخلت، تعاون اور عالمی قوانین کی پاسداری آسیان کے بنیادی اصول ہیں۔آسیان کمیٹی نے مشرقی تیمور کو آسیان کا 11واں رکن بننے کا خیرمقدم کرتے ہوئے اسے ایک تاریخی پیش رفت قرار دیا، جو زیادہ جامع اور متحد جنوب مشرقی ایشیا کے لیے آسیان کے عزم کی عکاسی کرتی ہے۔فلپائن کی زیرِ صدارت 2026 میں آسیان کا مرکزی نعرہ اپنے مستقبل کی مشترکہ رہنمائی ہے، جبکہ تنظیم کی ترجیحات میں امن و سلامتی، عوامی ترقی اور خوشحالی کے راستے شامل ہیں۔بیان میں پاکستان اور آسیان کے درمیان تعلقات کو اہم قرار دیتے ہوئے کہا گیا کہ پاکستان نے 1993 میں سیکٹورل ڈائیلاگ پارٹنرشپ اور 2004 میں جنوب مشرقی ایشیا میں معاہدہ دوستی و تعاون میں شمولیت کے بعد آسیان کے ساتھ روابط کو مسلسل مضبوط کیا ہے۔ پاکستان کی آسیان ریجنل فورم میں شرکت اور آسیان رکن ممالک کے ساتھ بڑھتا ہوا دوطرفہ تعاون باہمی مفاہمت اور عملی تعاون کے مزید مواقع فراہم کرتا ہے۔
آسیان کمیٹی نے پاکستان اور آسیان کے درمیان تجارت و سرمایہ کاری، رابطہ کاری، ڈیجیٹل تبدیلی، تعلیم، موسمیاتی لچک، سیاحت، انسانی وسائل کی ترقی، سائنس و ٹیکنالوجی اور عوامی روابط سمیت مختلف شعبوں میں تعاون مزید بڑھانے کی حوصلہ افزائی کی۔کمیٹی نے کہا کہ جغرافیائی سیاسی غیر یقینی، معاشی مشکلات، تکنیکی تبدیلی اور موسمیاتی تبدیلی جیسے چیلنجز کے باوجود آسیان پاکستان میں اپنی اجتماعی آواز اور موجودگی کو مضبوط بنانے کے لیے حکومت پاکستان، سفارتی شراکت داروں، تعلیمی اداروں، کاروباری برادری اور دیگر متعلقہ حلقوں کے ساتھ تعاون جاری رکھے گی۔آسیان کمیٹی نے اس عزم کا اظہار کیا کہ آسیان کمیونٹی وژن 2045 پر عملدرآمد کے لیے پاکستان اور دیگر شراکت داروں کے ساتھ مل کر امن، خوشحالی، استحکام، شمولیت اور مشترکہ مواقع پر مبنی مستقبل کی جانب پیش رفت جاری رکھی جائے گی۔
