اسلام آباد(آئی پی ایس) سپریم کورٹ نے نور مقدم قتل کیس میں مرکزی مجرم ظاہر جعفر کی سزائے موت برقرار رکھنے کا تفصیلی تحریری فیصلہ جاری کر دیا۔ 13 صفحات پر مشتمل اس فیصلے میں جدید شواہد اور قانونی نکات کا تفصیل سے جائزہ لیا گیا ہے۔
سپریم کورٹ نے فیصلے میں کہا کہ “سائلنٹ وِٹنس تھیوری” کے تحت بغیر عینی گواہ کے ویڈیو شواہد کو قبول کیا جا سکتا ہے۔ مستند اور قابلِ اعتماد ویڈیو فوٹیج خود اپنے حق میں شہادت بن سکتی ہے، جیسا کہ بینک ڈکیتی کیس میں بھی ویڈیو فوٹیج کو گواہی کے بغیر تسلیم کیا گیا تھا۔
عدالت نے قرار دیا کہ ریکارڈ شدہ ویڈیوز، تصاویر، سی سی ٹی وی فوٹیج، ڈی وی آر اور ہارڈ ڈسک کو بطور شہادت پیش کیا جا سکتا ہے بشرطیکہ وہ قابلِ اعتماد ذرائع سے حاصل کی گئی ہوں۔ ڈیجیٹل شواہد اب بنیادی شہادت کی حیثیت رکھتے ہیں۔
تحریری فیصلے میں عدالت نے کہا کہ ملزم ظاہر جعفر نور مقدم کا بے رحم قاتل ہے اور کسی ہمدردی کا مستحق نہیں۔ عدالت نے دونوں زیریں عدالتوں کے فیصلوں کو درست قرار دیتے ہوئے ان کی توثیق کی۔
عدالت کے مطابق، ظاہر جعفر کی جانب سے نور مقدم پر جسمانی تشدد کی ویڈیو بطور ثبوت پیش کی گئی۔ ان ویڈیوز میں کسی قسم کی ترمیم ثابت نہیں ہوئی، اور ملزم کی شناخت درست نکلی۔ ڈی این اے رپورٹ سے زیادتی کی تصدیق ہوئی جبکہ آلہ قتل پر مقتولہ کا خون بھی پایا گیا۔
عدالت نے یہ بھی واضح کیا کہ ظاہر جعفر نور مقدم کی موجودگی کی کوئی وضاحت پیش نہ کر سکا۔ تاہم، عدالت نے زیادتی کے جرم میں دی گئی سزائے موت کو عمر قید میں تبدیل کر دیا، جبکہ اغوا کے الزام سے بری کر دیا گیا۔ البتہ نور مقدم کو غیرقانونی طور پر اپنے پاس رکھنے کی سزا برقرار رکھی گئی۔
شریک ملزمان محمد افتخار اور محمد جان کی سزائیں برقرار رکھی گئی ہیں، تاہم عدالت نے نرمی برتتے ہوئے ان کی سزاؤں میں کمی کر دی اور جتنی قید وہ کاٹ چکے، اس کے بعد رہا کرنے کا حکم دیا۔
عدالت عظمیٰ نے یہ بھی کہا کہ اگر سی سی ٹی وی فوٹیج مقررہ معیار پر پوری اترتی ہو تو اس کی مزید تصدیق کی ضرورت نہیں۔
تحریری فیصلے میں بتایا گیا کہ جسٹس علی باقر نجفی اس حوالے سے اپنا اضافی نوٹ پیش کریں گے۔
