اسلام آباد: رومانیہ کے سفیر ڈین سٹینوسو نے کہا ہے کہ رومانیہ کے سربراہانِ مشن کے سالانہ اجلاس کے موقع پر پاکستان کے بخارسٹ میں سفیر الیاس نظامی سے ملاقات دونوں ممالک کے تعلقات پر تبادلہ خیال کا بہترین موقع ثابت ہوئی۔
سفیر ڈین سٹینوسو نے سوشل میڈیا پر اپنی پوسٹ میں کہا کہ ملاقات کے دوران دونوں ممالک کی سفارتی اکیڈمیوں کے درمیان اہم معاہدوں، جبکہ تعلیم، پریس اور ثقافت کے شعبوں میں تعاون سے متعلق معاہدوں پر جلد دستخط کرنے کے حوالے سے بات چیت ہوئی۔
انہوں نے کہا کہ عالمی امور کے ڈائریکٹر جنرل کیلن متری نے بھی ملاقات میں شرکت کی اور رومانیہ اور پاکستان کے باہمی تعلقات کو مزید مستحکم کرنے کے لیے قیمتی تزویراتی رہنمائی فراہم کی۔
رومانیہ کے سفیر نے اس عزم کا اظہار کیا کہ دونوں ممالک کے درمیان سفارتی، تعلیمی، صحافتی اور ثقافتی روابط کو مزید فروغ دیا جائے گا۔
