پاکستان پر حملے کی بھارتی سازش بے نقاب ، محمد عارف نے قوم کو خبردار کر دیا

کیلیفورنیا(آئی پی ایس) بانی تحریکِ انقلاب پاکستان محمد عارف نے انکشاف کیا ہے کہ بھارتی وزیرِاعظم نریندر مودی کی حکومت پاکستان، آزاد کشمیر اور گلگت بلتستان پر حملے کی خفیہ تیاریوں میں مصروف ہے۔ انہوں نے دعویٰ کیا ہے کہ بھارت کو افغانستان میں موجود بعض عناصر کی حمایت حاصل ہے، جبکہ بھارتی خفیہ ایجنسی “را” کی مدد سے پاکستانی حدود میں خفیہ راستے اور رسائی پوائنٹس بنائے جا چکے ہیں، خصوصاً گلگت بلتستان اور آزاد کشمیر میں۔
محمد عارف کا کہنا تھا کہ حالیہ جنگ بندی محض ایک فریب تھا، جس کا مقصد پاکستان کی عسکری صلاحیت اور خصوصی دفاعی یونٹس کی تفصیلات حاصل کرنا تھا۔ اب بھارت ایک بار پھر جارحیت کی راہ پر گامزن ہے، اور پوری قوم کو اپنی بہادر افواج کے شانہ بشانہ کھڑا ہونا ہو گا۔
انہوں نے مزید کہا کہ بھارت کی اصل سازش پاکستان اور چین کے درمیان زمینی رابطے کو منقطع کرنا ہے، اور گلگت بلتستان کو نشانہ بنا کر پاکستان کی اسٹریٹجک پوزیشن کو نقصان پہنچانا ہے۔ گجرات کو تحفظ فراہم کرنا مودی کا ذاتی ایجنڈا ہے، کیونکہ یہ اس کا آبائی علاقہ اور سب سے پسندیدہ ریاست ہے۔ اطلاعات کے مطابق ایک وقت ایسا بھی تھا جب گجرات کو بھارت کا دارالحکومت بنانے پر غور کیا گیا۔
محمد عارف نے آر ایس ایس، بی جے پی، شیو سینا اور را کو مکمل طور پر ناکام قرار دیتے ہوئے کہا کہ ان کی تمام سازشیں پاکستان کی بہادر افواج اور انٹیلیجنس اداروں نے ناکام بنا دی ہیں۔ اب وقت آ گیا ہے کہ پوری قوم بیدار ہو، اور دشمن کو بھرپور جواب دینے کے لیے تیار ہو جائے۔
تحریکِ انقلاب پاکستان ہر پاکستانی کو دعوت دیتی ہے کہ وہ وطن کی حفاظت کے لیے ایک پرچم تلے متحد ہو جائے۔ دشمن کی ہر چال کو اتحاد، ایمان اور قربانی سے ناکام بنانا ہو گا۔