بیجنگ (آئی پی ایس )چین نے بھارت کے ساتھ متنازع سرحدی علاقے لداخ میں دو نئی کانٹیاں بنالیں۔ بھارت کی جانب سے چینی اقدام پر شدید احتجاج کیا گیا ہے اور بھارتی وزارت خارجہ نے کہا ہے کہ ان دو کانٹیوں کا کچھ حصہ لداخ میں آتا ہے۔ بھارتی وزارت خارجہ کے ترجمان کے مطابق بھارتی علاقے پر چین کے ناجائز قبضے کو کبھی تسلیم نہیں کیا، چینی اقدام پر اعتراض اور احتجاج سفارتی ذرائع سے چین تک پہنچا دیا ہے۔
چینی میڈیا کے مطابق چین نے ہوتان پریفیکچر میں لداخ کے کچھ حصے شامل کرکے دو نئی کانٹیوں کے قیام کا اعلان کیا ہے ۔کشمیر میڈیا سروس کے مطابق چین کی نئی کانٹیوں میں اکسائے چن کے علاقے کا بڑا حصہ شامل ہے، بھارت اکسائیچن کے علاقے پر چین کے غیرقانونی قبضیکا الزام لگاتا ہے۔ چینی میڈیا کے مطابق ہیان کانٹی اور ہیکانگ کانٹی کا قیام حکومت اور ریاستی کونسل کی منظوری کے بعد کیا گیا۔
چین کا یہ اقدام بھارت اور چین کے درمیان 5 سال بعد ہونے والے سرحدی مذاکرات کے چند دن بعد کیا گیا ہے۔چین اور بھارت کے درمیان سرحدی مذاکرات گزشتہ ماہ بھارتی قومی سلامتی کے مشیر اجیت دوول کے دورہ بیجنگ میں ہوئے تھے۔ 2020 میں لداخ میں سرحدی کشیدگی کے بعد سے دونوں ممالک کے تعلقات کشیدہ ہیں، چین اور بھارت کے فوجیوں کے درمیان جھڑپوں میں کئی بھارتی فوجی مارے گئے تھے۔
