صدرِ مملکت کی سعودی سفیر نواف بن سعید المالکی کی پاک سعودی تعلقات کے فروغ میں خدمات کی تعریف

اسلام آباد (سب نیوز) صدرِ مملکت آصف علی زرداری نے پاکستان میں سعودی عرب کے سفیر نواف بن سعید المالکی کی پاکستان اور سعودی عرب کے درمیان دیرینہ برادرانہ اور تزویراتی تعلقات کے استحکام کے لیے خدمات کو سراہا ہے۔
صدرِ مملکت نے ان خیالات کا اظہار سعودی سفیر نواف بن سعید المالکی سے ایوانِ صدر میں الوداعی ملاقات کے دوران کیا۔
صدر نے اپنے دورِ سفارت کے دوران پاکستان کے لیے سفیر کی گراں قدر خدمات، دوستی، گرمجوشی اور تعاون کو سراہا۔ انہوں نے کہا کہ سفیر نواف بن سعید المالکی نے بالخصوص سیاسی، اقتصادی اور تجارتی شعبوں میں دوطرفہ تعلقات کے فروغ میں اہم کردار ادا کیا۔
صدرِ مملکت نے کہا کہ پاکستان سعودی عرب کے ساتھ اپنی دیرینہ اور آزمودہ دوستی اور تزویراتی شراکت داری کو انتہائی قدر کی نگاہ سے دیکھتا ہے اور پاکستان کے لیے سعودی عرب کی مستقل حمایت کو سراہتا ہے۔ انہوں نے اس اعتماد کا اظہار کیا کہ سفیر نواف کے دور میں تعلقات کے لیے قائم کی گئی مضبوط بنیاد آنے والے برسوں میں بھی دوطرفہ تعاون کی رہنمائی کرتی رہے گی۔
سعودی سفیر نواف بن سعید المالکی، جو 2017 سے پاکستان میں سعودی عرب کے سفیر کی حیثیت سے خدمات انجام دے رہے ہیں، نے اپنے قیام کے دوران حکومت اور عوامِ پاکستان کی جانب سے ملنے والی محبت، گرمجوشی اور تعاون پر صدرِ مملکت کا شکریہ ادا کیا۔ انہوں نے کہا کہ وہ پاکستان اور اس کے عوام کو ہمیشہ قدر و احترام کی نگاہ سے دیکھیں گے۔
صدرِ مملکت نے سفیر نواف بن سعید المالکی کے لیے نیک خواہشات کا اظہار کرتے ہوئے ان کی آئندہ ذمہ داریوں اور مستقبل کی کوششوں میں کامیابی کی دعا کی۔ انہوں نے کہا کہ پاکستان ہمیشہ ان کا دوسرا گھر رہے گا۔ملاقات کے دوران سینیٹر شیری رحمان بھی موجود تھیں۔