اسپین کی آئی ای یونیورسٹی کے وفد کی ایچ ای سی پاکستان آمد، پاکستانی طلبہ کے لیے بین الاقوامی تعلیمی مواقع بڑھانے پر تبادلہ خیال

اسلام آباد (سب نیوز) — اسپین کی آئی ای یونیورسٹی کے ایک وفد نے ہائر ایجوکیشن کمیشن (ایچ ای سی) پاکستان کا دورہ کیا اور چیئرمین ایچ ای سی پروفیسر ڈاکٹر نیاز احمد اختر سے ملاقات کی۔ ملاقات میں تعلیمی تعاون کے فروغ اور باصلاحیت پاکستانی طلبہ کے لیے بین الاقوامی اعلیٰ تعلیم کے مواقع بڑھانے کے امکانات پر تبادلہ خیال کیا گیا۔
ملاقات کے دوران آئی ای یونیورسٹی کی نمائندہ محترمہ آندریا روڈریگز ویلیز نے یونیورسٹی کے تعلیمی پروگراموں، عالمی وژن اور بین الاقوامی تعاون کے اقدامات کے بارے میں وفد کی جانب سے تفصیلی بریفنگ دی۔ انہوں نے مختلف شعبہ جات میں انڈرگریجویٹ اور پوسٹ گریجویٹ پروگراموں میں پاکستانی طلبہ کے داخلوں کو آسان بنانے کے لیے ایچ ای سی کے ساتھ ممکنہ تعاون کے مواقع کو اجاگر کیا۔
گفتگو میں تعلیمی روابط کو مضبوط بنانے، طلبہ کے بین الاقوامی تبادلوں کو فروغ دینے اور پاکستانی طلبہ کے لیے عالمی معیار کی اعلیٰ تعلیم تک رسائی کے نئے مواقع پیدا کرنے پر زور دیا گیا۔
چیئرمین ایچ ای سی پروفیسر ڈاکٹر نیاز احمد اختر نے اعلیٰ تعلیم کے شعبے میں آئی ای یونیورسٹی کی خدمات کو سراہا اور پاکستانی طلبہ کو بیرون ملک اعلیٰ تعلیم کے مواقع فراہم کرنے کے لیے ایچ ای سی کے بین الاقوامی اسکالرشپ پروگراموں پر روشنی ڈالی۔
انہوں نے وفد کی حوصلہ افزائی کی کہ وہ پاکستان کے ممتاز تعلیمی اداروں، بشمول نیشنل یونیورسٹی آف سائنسز اینڈ ٹیکنالوجی (نسٹ) اور نیشنل یونیورسٹی آف کمپیوٹر اینڈ ایمرجنگ سائنسز (فاسٹ۔این یو سی ای ایس) کے ساتھ بھی روابط قائم کرے، تاکہ باصلاحیت طلبہ کی نشاندہی اور تعلیمی تعاون کو مزید مستحکم بنایا جا سکے۔
اس ملاقات کو پاکستان اور اسپین کے درمیان اعلیٰ تعلیم کے شعبے میں تعاون بڑھانے، جامعات کے مابین روابط مستحکم کرنے اور پاکستانی طلبہ کے لیے بین الاقوامی تعلیمی مواقع کو وسعت دینے کی جانب ایک اہم پیش رفت قرار دیا گیا۔