ایپل نے آئی فون 18 پرو اور 18 پرو میکس متعارف کرا دیے

امریکی ٹیکنالوجی کمپنی ایپل نے آئی فون 18 پرو اور آئی فون 18 پرو میکس متعارف کرا دیے ہیں۔
نئے آئی فونز میں 48 میگا پکسل فیوژن مین کیمرا پہلی مرتبہ ویری ایبل اپرچر کے ساتھ دیا گیا ہے جس کے ذریعے صارفین تصویر بناتے وقت زیادہ تخلیقی کنٹرول حاصل کرسکیں گے۔
ایپل کے مطابق نئے سینسر کے باعث کم روشنی میں بہتر فوٹوگرافی اور گروپ تصاویر میں زیادہ واضح تفصیلات حاصل کی جاسکیں گی۔
آئی فون 18 پرو کے کیمرا ایپ میں پرو کنٹرولز بھی متعارف کرائے گئے ہیں جن کے ذریعے صارفین لینز اپرچر، شٹر اسپیڈ اور وائٹ بیلنس سمیت مختلف سیٹنگز خود ایڈجسٹ کرسکیں گے۔ کیمرا ایپ میں ہسٹوگرام کے ذریعے ایکسپوژر لیولز بھی دیکھے جاسکیں گے۔
نئے کمپیوٹیشنل امیجنگ پائپ لائن کے ساتھ مین کیمرا زیادہ واضح اور تفصیلی تصاویر بنائے گا جبکہ اپ گریڈ کیے گئے فوٹوگرافک اسٹائلز میں ٹیکسچر اور گرین کنٹرولز بھی شامل کیے گئے ہیں۔
ویڈیو کے لیے بھی نئے فیچرز متعارف کرائے گئے ہیں۔ صارفین اب 60 فریم فی سیکنڈ تک ریکارڈ کی گئی ویڈیوز پر کیپچر کے بعد سنیماٹک ایفیکٹس لاگو کرسکیں گے۔ ٹائم لیپس موڈ میں 4K اور ڈولبی وژن ایچ ڈی آر ویڈیوز ریکارڈ کی جاسکیں گی، جبکہ آڈیو مکس میں نئے الگورتھمز کے ذریعے آواز کا معیار بہتر بنایا گیا ہے۔
تصاویر کی اصلیت جانچنے کا نیا فیچر
ایپل نے آئی فون 18 پرو میں ’ایپل ریفرنس امیج‘ بھی متعارف کرایا ہے، جس کے ذریعے صارفین تصویر کی اصلیت جانچ سکیں گے۔
ریفرنس امیج کو فوٹوز ایپ میں اصل تصویر کے ساتھ دیکھا جاسکے گا تاکہ دونوں تصاویر کا بصری موازنہ کرکے معلوم کیا جاسکے کہ تصویر میں کوئی ترمیم کی گئی ہے یا نہیں۔
ڈائنامک آئی لینڈ میں بھی تبدیلی
آئی فون 18 پرو اور آئی فون 18 پرو میکس میں ڈائنامک آئی لینڈ کو بھی دوبارہ ڈیزائن کیا گیا ہے۔ ایپل کے مطابق نیا ڈائنامک آئی لینڈ بیک وقت 3 لائیو ایکٹیویٹیز دکھا سکے گا جبکہ فیس آئی ڈی کے ذریعے فون ان لاک کرنے اور ادائیگیوں سمیت دیگر تصدیقی سہولیات برقرار رہیں گی۔
اے 20 پرو چپ اور بہتر کارکردگی
نئے آئی فونز میں اے 20 پرو چپ دی گئی ہے جو 2 نینو میٹر پراسیس ٹیکنالوجی پر تیار کی گئی ہے۔ اس میں اے 19 پرو کے مقابلے میں 50 فیصد زیادہ میموری بینڈوڈتھ ہے۔
6 کور سی پی یو میں مربوط نیورل ایکسیلیریٹرز شامل ہیں، جبکہ 7 کور جی پی یو اے 19 پرو کے مقابلے میں 40 فیصد تک تیز ہے۔ اے 20 پرو میں نیا ڈوئل 16 کور نیورل انجن بھی دیا گیا ہے، جس کے مجموعی طور پر 32 کورز آن ڈیوائس اے آئی اور کمپیوٹیشنل فوٹوگرافی کی پروسیسنگ کو بہتر بناتے ہیں۔
دونوں ماڈلز میں ایپل کی جانب سے ڈیزائن کردہ این ون وائرلیس نیٹ ورکنگ چپ بھی موجود ہے جو وائی فائی 7، بلوٹوتھ 6 اور تھریڈ کو سپورٹ کرتی ہے۔
بیٹری اور تھرمل سسٹم میں بڑی بہتری
آئی فون 18 پرو میکس میں بیٹری لائف میں آئی فون کی تاریخ کا سب سے بڑا اضافہ کیا گیا ہے۔ ای سم والے ماڈلز میں آئی فون 18 پرو 36 گھنٹے جبکہ آئی فون 18 پرو میکس 45 گھنٹے تک ویڈیو پلے بیک فراہم کرسکتا ہے۔
آئی فون 18 پرو تقریباً 15 منٹ میں 50 فیصد تک چارج ہوسکتا ہے جبکہ وائرلیس چارجنگ کے ذریعے تقریباً 30 منٹ میں 50 فیصد چارج کیا جاسکتا ہے۔ آئی فون 18 پرو میکس میں 5 منٹ کی وائرڈ چارجنگ تقریباً 7 گھنٹے کے ویڈیو پلے بیک کے لیے کافی ہوگی۔
آئی او ایس 27 اور سری اے آئی
آئی فون 18 پرو اور پرو میکس میں آئی او ایس 27 کے ساتھ ایپل انٹیلی جنس اور سری اے آئی کی سہولیات بھی شامل ہیں۔ سری اے آئی بیٹا ورژن میں دستیاب ہوگی اور صارف کے ذاتی سیاق و سباق کو سمجھتے ہوئے پیغامات، ای میلز اور تصاویر میں مطلوبہ معلومات تلاش کرنے میں مدد دے سکے گی۔
ایپل کے مطابق پرائیویسی کے تحفظ کے لیے ایپل انٹیلی جنس آن ڈیوائس پروسیسنگ اور پرائیویٹ کلاؤڈ کمپیوٹ استعمال کرتی ہے۔
قیمت اور دستیابی
آئی فون 18 پرو اور آئی فون 18 پرو میکس 256 جی بی، 512 جی بی، 1 ٹی بی اور 2 ٹی بی اسٹوریج میں دستیاب ہوں گے۔ دونوں ماڈلز بلیک، سلور، گلیشیئر اور نئے برگنڈی رنگ میں پیش کیے گئے ہیں۔
آئی فون 18 پرو کی امریکی قیمت 1,199 ڈالر سے شروع ہوگی جبکہ آئی فون 18 پرو میکس کی قیمت 1,299 ڈالر سے شروع ہوگی۔
پری آرڈرز 12 ستمبر سے شروع ہوں گے جبکہ دونوں ماڈلز 18 ستمبر 20160سے دستیاب ہوں گے۔