اسلام آباد(سب نیوز) : پاکستان میں کیوبا کے سفیر دامیان کورڈیرو ٹوریس نے اسلامی جمہوریہ پاکستان کے 79ویں یوم آزادی کے موقع پر پاکستانی قیادت اور عوام کو کیوبا کی حکومت اور عوام کی جانب سے دلی مبارکباد اور نیک تمناؤں کا اظہار کیا ہے۔
اپنے تہنیتی پیغام میں کیوبا کے سفیر نے کہا کہ اس تاریخی موقع پر پاکستان کی قیادت اور عوام کو مبارکباد پیش کرنا ان کے لیے باعث اعزاز ہے۔
انہوں نے کہا کہ کیوبا اور پاکستان کے دوطرفہ تعلقات باہمی یکجہتی، اعتماد اور خودمختاری کے مشترکہ اصولوں کی مضبوط تاریخ پر استوار ہیں۔ دونوں ممالک کے درمیان تاریخی تعاون، بالخصوص صحت عامہ کے بحرانوں سے نمٹنے اور اعلیٰ تعلیمی ترقی کے شعبوں میں تعاون، جنوب-جنوب تعاون اور بین الاقوامی شراکت داری کی ایک مثالی مثال ہے۔
کیوبا کے سفیر نے کہا کہ موجودہ پیچیدہ عالمی صورتحال میں کیوبا پاکستان کے ساتھ دوطرفہ روابط کو مزید مستحکم کرنے کے لیے پرعزم ہے۔
انہوں نے کہا کہ کیوبا پاکستان کے ساتھ سفارتی تعلقات کو مزید مضبوط بنانے اور باہمی دلچسپی کے اہم شعبوں میں ادارہ جاتی تعاون کو فروغ دینے کا خواہاں ہے تاکہ دونوں ممالک کے تاریخی تعلقات کو ٹھوس اور طویل المدتی اسٹریٹجک پیش رفت میں تبدیل کیا جا سکے۔
سفیر دامیان کورڈیرو ٹوریس نے پاکستان کے یوم آزادی کے موقع پر پاکستانی عوام کے لیے مسلسل امن، اتحاد اور خودمختار ترقی کے لیے نیک خواہشات کا اظہار کیا۔
