راولپنڈی واقعے کا ملزم خیبرپختونخوا ہاوس میں رہتا رہا ، پی ٹی آئی قیادت سے بھی ملتا رہا، طلال چوہدری

اسلام آباد (سب نیوز)وزیر مملکت برائے داخلہ طلا ل چوہدری نے کہا ہے کہ گزشتہ روز راولپنڈی میں افسوسناک واقعہ ہوا، سکیورٹی فورسز پرحملہ کرکے ان کی جان لینے کی کوشش کی گئی۔
پریس کانفرنس سے خطاب کرتے ہوئے طلا ل چوہدری کا کہنا تھا کہ پی ٹی آئی قیادت راولپنڈی مال روڈ واقعے سے خود کو بری الذمہ نہیں قرار دے سکتی، ہلاک ملزم خیبر پختونخوا ہاس میں رہتا رہا اور تحریک انصاف کی قیادت سے بھی ملتا رہا۔انہوں نے کہا کہ کہا گیا کہ جوابی کارروائی میں جاں بحق شخص کا دماغی توازن درست نہیں تھا ، اگر ذہنی توازن درست نہیں تھا تو پہلے ہی خود سے الگ کیوں نہیں کیا گیا ؟ کیا حملہ آورنے اپنے گھر کے کسی فرد پر حملہ کیا؟۔
وزیر مملکت نے کہا کہ پی ٹی آئی اپنے کارکنوں کی اچھی تربیت کرے ، پی ٹی آئی کے سیاسی رہنما متنفر ہو کر پارٹی سے الگ ہو رہے ہیں۔ پی ٹی آئی نفرت اور انتشار کی سیاست ترک کرے۔انہوں نے مزید کہا کہ گزشتہ روز جس اہلکار پر حملہ کیا گیا ، وہ ڈیوٹی کر رہا تھا، کیا جلاو گھیراو کی سیاست سے ملک کی خدمت ہو رہی ہے؟ سیاست کا نام خدمت ہے ،خیبر پختونخوا میں 17 سال سے آپ کی حکومت ہے وہاں کے لوگوں کو کیا دیا ہے؟ جب لوگوں کے ذہنوں میں نفرت بھر دی جائے تو ایسے واقعات ہوتے ہیں۔
انہوں نے کہا کہ بیرون ملک بیٹھے عناصر ویوز اور کمائی کے لیے اداروں کیخلاف ہرزہ سرائی کرتے ہیں، پاکستان میں استحکام آ رہا ہے ، امن کو خراب کرنے نہیں دیں گے۔