نائب وزیراعظم اسحاق ڈار سے ایرانی سفیر کی ملاقات، پاکستان ایران تعلقات مزید مضبوط بنانے کا عزم

اسلام آباد (سب نیوز)ایرانی سفیر رضا امیری مقدم نے نائب وزیراعظم و وزیر خارجہ سینیٹر محمد اسحاق ڈار سے ملاقات کی، جس میں پاکستان اور ایران کے درمیان دوطرفہ تعاون مزید مستحکم بنانے پر تبادلہ خیال کیا گیا۔
دفتر خارجہ کی جانب سے جاری بیان میں کہا گیا ہے کہ ملاقات میں اعلی سطح کے دوروں کے حالیہ تبادلے کے بعد مختلف ادارہ جاتی میکنزم کے تحت ہونے والی پیش رفت کا جائزہ لیا گیا۔اسحاق ڈار نے علاقائی مسائل کے حل اور پائیدار امن و استحکام کے لیے مذاکرات اور سفارت کاری کو موثر ترین ذریعہ قرار دیا۔
ملاقات کے دوران ایرانی سفیر نے پاکستان اور ایران کے درمیان دوطرفہ ادارہ جاتی میکنزم کے تحت مختلف شعبوں میں تعاون کے فروغ کے لیے ہونے والی پیش رفت سے نائب وزیراعظم کو آگاہ کیا۔یہ پیش رفت دونوں ممالک کے درمیان حالیہ اعلی سطح کے دوروں کے تبادلے کے بعد سامنے آنے والے اقدامات کا حصہ ہے، جن کا مقصد دوطرفہ تعلقات کو مزید وسعت دینا اور باہمی تعاون کے نئے امکانات پیدا کرنا ہے۔
نائب وزیراعظم و وزیر خارجہ اسحاق ڈار نے پاکستان کی جانب سے ایران کے ساتھ تعلقات اور روابط کو مزید گہرا کرنے کے عزم کا اعادہ کیا۔انہوں نے کہا کہ پاکستان باہمی دلچسپی کے اہم اور ترجیحی شعبوں میں ایران کے ساتھ تعاون کو مزید آگے بڑھانے کے لیے پرعزم ہے۔ملاقات میں دونوں ممالک کے درمیان موجودہ تعاون کو مزید مثر بنانے اور دوطرفہ ادارہ جاتی رابطوں کو جاری رکھنے کی اہمیت پر بھی بات چیت ہوئی۔
ملاقات کے دوران خطے کی بدلتی ہوئی صورتحال پر بھی تفصیلی تبادلہ خیال کیا گیا۔ اسحاق ڈار نے اس موقع پر زور دیا کہ زیر التوا علاقائی مسائل کے حل اور دیرپا امن، استحکام اور خوشحالی کے حصول کے لیے مذاکرات اور سفارت کاری ہی موثر ترین راستہ ہیں۔انہوں نے کہا کہ علاقائی تنازعات اور اختلافات کا پائیدار حل بات چیت اور سفارتی ذرائع کے ذریعے ہی تلاش کیا جانا چاہیے۔پاکستان اور ایران طویل عرصے سے دوطرفہ تجارت، سرحدی امور، توانائی، سلامتی اور علاقائی تعاون سمیت مختلف شعبوں میں رابطے برقرار رکھے ہوئے ہیں۔دونوں ممالک کے درمیان اعلی سطح کی قیادت کے روابط میں حالیہ عرصے کے دوران تیزی آئی ہے، جبکہ مختلف ادارہ جاتی میکنزم کے ذریعے باہمی تعاون کو عملی شکل دینے کی کوششیں بھی جاری ہیں۔