اسلام آباد (سب نیوز)پاکستان میں تھائی لینڈ کے سفارتخانے نے ڈاکٹر اکبر نیازی ٹیچنگ ہسپتال کے اشتراک سے تھائی لینڈ کے بادشاہ کی سالگرہ کے موقع پر ایک روزہ طبی کیمپ کا انعقاد کیا، جس سے سینکڑوں افراد نے استفادہ کیا۔ کیمپ کا مقصد ایسے افراد کو بلا معاوضہ معیاری صحت کی سہولیات فراہم کرنا تھا جو مالی مشکلات کے باعث بروقت طبی معائنہ اور تشخیصی خدمات حاصل نہیں کر پاتے۔ کیمپ میں جنرل میڈیسن، بریسٹ ہیلتھ، غذا اور غذائیت سمیت مختلف شعبوں میں ڈاکٹروں نے مریضوں کا معائنہ اور مشاورت فراہم کی۔شرکا کو میڈیکل چیک اپ، مختلف تشخیصی ٹیسٹ اور ضرورت کے مطابق ادویات بھی فراہم کی گئیں۔
ایک ہی جگہ پر معائنہ، تشخیص، ماہرین سے مشاورت اور ادویات کی سہولت میسر آنے کے باعث بڑی تعداد میں لوگوں نے کیمپ سے فائدہ اٹھایا۔پاکستان میں تھائی لینڈ کے سفیر رونگ ودھی ویرا بتر نے سفارتخانے کے وفد کے ہمراہ کیمپ کا دورہ کیا اور مریضوں، ڈاکٹروں، طبی عملے اور رضاکاروں سے ملاقات کی۔ ان کا استقبال جی اے کے ہیلتھ کیئر انٹرنیشنل کے گروپ چیف ایگزیکٹو آفیسر یاسر خان نیازی، ڈاکٹر اکبر نیازی ٹیچنگ ہسپتال کی ڈائریکٹر ڈاکٹر اریج نیازی اور ہسپتال کی سینئر انتظامیہ نے کیا۔تھائی سفیر نے کیمپ میں قائم معائنے، اسکریننگ اور تشخیصی سہولیات کا جائزہ لیا، مریضوں سے گفتگو کی اور ڈاکٹروں و طبی عملے کی خدمات کو سراہا۔ انہوں نے اسلام آباد میڈیکل اینڈ ڈینٹل کالج کے طلبہ رضاکاروں کی بھی تعریف کی، جنہوں نے مریضوں کی رہنمائی اور کیمپ کے انتظامات کو منظم رکھنے میں اہم کردار ادا کیا۔یاسر خان نیازی نے کہا کہ یہ اقدام اس بات کی عملی مثال ہے کہ بامعنی بین الاقوامی شراکت داریاں لوگوں کی زندگیوں میں مثبت تبدیلی لانے کے ساتھ دوست ممالک کے تعلقات کو بھی مزید مضبوط بنا سکتی ہیں۔
انہوں نے کہا کہ پاکستان اور تھائی لینڈ کے درمیان دیرینہ دوستانہ تعلقات ہیں اور صحت، طبی تعلیم، کلینیکل تربیت، تحقیق اور علمی تبادلے کے شعبوں میں باہمی تعاون کے وسیع امکانات موجود ہیں.انہوں نے مزید کہا کہ تھائی سفارتخانے کی جانب سے بادشاہ کی سالگرہ کے موقع پر عوامی خدمت کا یہ اقدام قابلِ تحسین ہے، جس سے سینکڑوں مستحق مریض مستفید ہوئے۔ اکبر نیازی ٹیچنگ ہسپتال عوام کو معیاری صحت کی سہولیات کی فراہمی اور بین الاقوامی تعاون کے فروغ کے لیے ایسے اقدامات کی حمایت جاری رکھے گا۔کیمپ سے استفادہ کرنے والے افراد نے ڈاکٹروں کی مشاورت، تشخیصی خدمات اور ادویات کی فراہمی پر اطمینان کا اظہار کیا۔ کئی مریضوں نے کیمپ کو بروقت اور مفید قرار دیتے ہوئے کہا کہ ایسے اقدامات ان خاندانوں کے لیے خاص طور پر اہم ہیں جو مالی مشکلات کے باعث باقاعدگی سے طبی معائنہ نہیں کرا پاتے۔ منتظمین نے اس امید کا اظہار کیا کہ پاکستان اور تھائی لینڈ کے درمیان اس نوعیت کے مشترکہ فلاحی اور میڈیکل اقدامات مستقبل میں بھی جاری رہیں گے، جس سے عوام کو بہتر صحت کی سہولیات کی فراہمی کے ساتھ دونوں ممالک کے درمیان عوامی روابط اور صحت کے شعبے میں تعاون بھی مزید فروغ پائے گا۔
