اسلام آباد: سابق وفاقی وزیر اور سینئر سیاستدان محمد علی درانی نے ترکمانستان کے سفیر عطا جان مولا (Atadjan Movlamov) سے اسلام آباد میں ملاقات کی۔
ملاقات کے دوران محمد علی درانی نے ترکمانستان کے صدر سردار بردمحمدوف اور عوام کے لیے پاکستانی عوام کی جانب سے خیرسگالی کا پیغام پہنچایا۔
ترکمانستان کے سفیر نے سفارت خانے آمد پر محمد علی درانی کا پرتپاک استقبال کیا اور انہیں غیر ملکی سرمایہ کاروں اور تجارت کے فروغ کے لیے اپنی حکومت کے اقدامات اور مراعات سے آگاہ کیا۔ملاقات میں دونوں رہنماؤں نے عوام اور کاروباری برادری کی سطح پر دوطرفہ روابط بڑھانے اور تاجروں، چیمبرز آف کامرس کے درمیان براہ راست رابطے قائم کرنے پر اتفاق کیا۔
محمد علی درانی نے کہا کہ ترکمانستان شاہراہِ ریشم کا تاریخی سنگم رہا ہے، اسے خطے میں تجارت کے فروغ کے لیے کلیدی شاہراہ کا کردار ادا کرنا ہوگا۔ انہوں نے مزید کہا کہ تیل و گیس سے مالامال ترکمانستان پاکستان میں توانائی کے شعبے میں نجی شعبے کے ساتھ وسیع شراکت داری قائم کر سکتا ہے۔
انہوں نے زور دیا کہ پاکستان اور امن و ترقی پسند ممالک کے خوشگوار تعلقات پورے خطے کو معاشی ترقی کا محور بنا سکتے ہیں۔ترکمانستان کے سفیر عطا جان مولا نے محمد علی درانی کی تجاویز کا خیرمقدم کیا اور ان پر عملدرآمد کے لیے تعاون کی یقین دہانی کرائی۔ ملاقات کے اختتام پر سفیر نے محمد علی درانی کو یادگاری شیلڈ بھی پیش کی۔
