اقوام متحدہ کی سلامتی کونسل کے پانچ غیر مستقل ارکان کے انتخاب کے لیے جنرل اسمبلی کا اجلاس جمعرات کوہو گا، پاکستان کی کامیابی کے روشن امکانات

اقوام متحدہ:اقوام متحدہ کی سلامتی کونسل کے پانچ غیر مستقل ارکان کے انتخاب کے لیے اقوام متحدہ کی جنرل اسمبلی کا اجلاس کل (جمعرات کو) ہو گا۔ جاپان کی خالی ہونے والی ایشیائی نشست پر پاکستان نے لابنگ سرگرمیاں تیز کر دی ہیں۔ غیر مستقل نشستوں کے لئے منتخب ہونے والے رکن ممالک 2 سال یعنی یکم جنوری 2025 سے 2026 کے آخر تک خدمات انجام دیں گے۔
پانچ غیر مستقل ارکان جاپان، ایکواڈور، مالٹا، موزمبیق اور سوئٹزرلینڈ کی جگہ لیں گے جن کی مدت 31 دسمبر کو ختم ہو گی۔ اقوام متحدہ کے چارٹر کے تحت سلامتی کونسل کی بنیادی ذمہ داری بین الاقوامی امن و سلامتی کو برقرار رکھنا ہے۔ پاکستان جو سات بار سلامتی کونسل کا غیر مستقل رکن منتخب ہو چکا ہے کی حمایت53 رکنی ایشیائی گروپ نے کی ہے اور اب تک پاکستان کے مقابلے میں کوئی امیدوار سامنے نہیں آیا جس کی وجہ سے پاکستان کی کامیابی کے روشن امکانات ہیں۔ قبل ازیں 13۔2012، 04۔2003 ،94۔1993 ، 84۔1983 ، 77۔1976، 69۔1968 اور 53۔1952 میں پاکستان سلامتی کونسل کے غیر مستقل رکن کی حیثیت سے خدمات سرانجام دے چکا ہے۔ سلامتی کونسل کے ارکان کی تعداد 15 ہوتی ہے جن میں سے پانچ ممالک مستقل رکن ہیں ۔
ان میں چین، فرانس، روس، برطانیہ اور امریکا شامل ہیں جنہیں سلامتی کونسل میں کسی بھی قرارداد یا فیصلے کو ویٹو کرنے کا حق حاصل ہے جبکہ 10 غیر مستقل اراکین کو 193 رکنی جنرل اسمبلی منتخب کرتی ہے۔ ووٹنگ خفیہ رائے شماری کے ذریعے کی جاتی ہے اور امیدواروں کو دو تہائی اکثریت، یا 128 ووٹ درکار ہوتے ہیں چاہے وہ بلا مقابلہ ہی کیوں نہ ہوں۔ اگر کوئی امیدوار ہدف سے کم ووٹ لیتا ہے تو ووٹوں کی مطلوبہ تعداد حاصل کرنے تک دوبارہ پولنگ کرائی جاتی ہے۔ اگر تعطل کی صورتحال پیدا ہوتی ہے تو اس امیدوار کو منتخب تصور کیا جاتا ہے جس کی مخالفت سب سے کم ہو۔پاکستانی وفد کی قیادت اقوام متحدہ میں پاکستان کے مستقل مندوب منیر اکرم کر رہے ہیں ۔ انہوں نے کئی مہینوں تک وزارت خارجہ اور دنیا بھر میں پاکستانی سفارت خانوں کے ساتھ مل کر محنت کی ہے، اور کامیابی کے لیے پوری طرح پراعتماد ہیں ۔
انہوں نے کہا کہ سلامتی کونسل کا غیر مستقل رکن منتخب ہو کر پاکستان اقوام متحدہ کے چارٹر کے اصولوں اور مقاصد کے مطابق بین الاقوامی امن و سلامتی کی بحالی اور تنازعات اور تنازعات کے پرامن حل کے لیے اپنی کوششیں وقف کرے گا۔ صومالیہ اور ماریشس افریقی نشست کے لیے امیدوار ہیں جبکہ ڈنمارک اور یونان مغربی یورپی نشست کے لیے میدان میں ہیں۔ پاناما لاطینی امریکی نشست کے لیے واحد امیدوار ہے۔