راول ڈیم کے اسپل ویز کھول دیے گئے، شہریوں کو آبی گزرگاہوں سے دور رہنے کی ہدایت

اسلام آباد(سب نیوز) ضلعی انتظامیہ نے وفاقی دارالحکومت اور گردونواح میں ہونے والی شدید بارش کے بعد ڈیم میں پانی کی سطح 1750 فٹ سے تجاوز کرجانے پر منگل کے روز راول ڈیم کے اسپل ویز کھول دیے۔
حکام کے مطابق راول ڈیم میں پانی کی سطح 1751.90 فٹ تک پہنچ گئی تھی جس کے باعث حکام نے دوپہر 2 بجے ڈیم کے اسپل ویز کھولنے کا فیصلہ کیا۔ضلعی انتظامیہ نے پنجاب ایمرجنسی سروس ریسکیو 1122، پولیس اور دیگر متعلقہ اداروں کو بھی آپریشن کے دوران چوکس رہنے کی ہدایت جاری کی۔ضلعی انتظامیہ کے مطابق پانی کی آمد کو ریگولیٹ کرنے اور پانی کی سطح کو محفوظ حد میں برقرار رکھنے کے لیے اسپل ویز کھولنے کا فیصلہ کیا گیا۔
انتظامیہ نے تمام متعلقہ اداروں کو ہدایت دی کہ آپریشن سے پہلے اور اس کے دوران ضروری حفاظتی اقدامات کو یقینی بنایا جائے۔حکام کے مطابق صورتحال کی نگرانی اور پانی کے بڑھتے ہوئے اخراج کے نتیجے میں پیش آنے والی کسی بھی صورتحال پر بروقت ردعمل دینے کے لیے ایمرجنسی اور سول اداروں کے درمیان رابطہ کاری جاری ہے۔ضلعی انتظامیہ نے مکینوں پر زور دیا کہ جب تک اسپل ویز کھلے رہیں وہ ندی نالوں، نکاسی آب کی گزرگاہوں اور نشیبی علاقوں سے دور رہیں۔
شہریوں کو ہدایت دی گئی ہے کہ وہ آبی گزرگاہوں کے قریب غیر ضروری آمد و رفت سے گریز کریں اور مقامی حکام کی جانب سے جاری کردہ ہدایات پر عمل کریں۔انتظامیہ کے مطابق اس اقدام سے جڑے خطرات کو کم سے کم کرنے کے لیے احتیاطی انتظامات کیے جا رہے ہیں اور نگرانی کرنے والی ٹیمیں پورے آپریشن کے دوران ڈیم کے ارد گرد پانی کی سطح اور حالات کا مسلسل جائزہ لیتی رہیں گی۔حکام نے عوام سے تعاون کی درخواست کی ہے اور مکینوں کو ہدایت کی ہے کہ وہ راول ڈیم پر جاری واٹر مینجمنٹ اقدامات کے دوران سرکاری اپڈیٹس کے ذریعے باخبر رہیں۔