وفاقی وزیر قانون اعظم نذیر تارڑ نے کہا ہے کہ اسلام آباد میں وفاقی خاتون محتسب کی تعیناتی کے لئے کسی قدر آور اور قانون کی سوجھ بوجھ رکھنے والی خاتون کی تلاش ہے۔ہفتے کو انہوں نے یہ بات اسلام آباد میں سپریم کورٹ وکلا کی ہاؤسنگ سوسائٹی کے پلاٹوں کی کمپیوٹرائزڈ قرعہ اندازی کی تقریب کے بعد میڈیا سے گفتگو کرتے ہوئے کی۔
وفاقی وزیر نے کہا کہ خاتون محتسب برائے انسداد ہراسیت کے عہدے کی مدت ختم ہونے کے بعد ان کی متبادل کے لیے مختلف نام زیرغور ہیں اور جلد ہی میرٹ کی بنیاد پر کوئی اچھی تقرری کر دی جائے گی۔ان کا کہنا تھا کہ وزیراعظم شہباز شریف کی یہ خواہش ہے کہ خواتین میں سے بہت ہی قد آور و قانون کو سمجھنے والی شخصیت کا انتخاب کیا جائے جو یہ اہم ذمہ داری نبھائیں۔
لاپتہ افراد کمیشن کے سربراہ جاوید اقبال کے جگہ نئی تعیناتی کے سوال پر ان کا کہنا تھا کہ کابینہ نے اس کے لیے اعلی سطح کی کمیٹی بنائی ہے جس میں مولانا اسعد محمود شامل ہیں۔
