وزیر اعظم شہباز شریف آج شانگلہ میں جلسے سے خطاب کریں گے

اسلام آباد(مانیٹرنگ ڈیسک)وزیر اعظم شہباز شریف آج ضلع شانگلہ کا دورہ کریں گے اور عوامی اجتماع سے خطاب کریں گے۔تفصیلات کے مطابق پاکستان مسلم لیگ ن کی عوامی رابطہ مہم کے تحت منعقد ہونے والے جلسے کی تیاریاں کر لی گئی ہیں۔ جلسے میں وزیر اعظم علاقے کی سماجی و اقتصادی ترقی کے لیے تاریخی ترقیاتی پیکج کا اعلان کریں گے۔اس حوالے سے وزیر اعظم کے مشیر انجینئر امیر مقام نے کہا کہ شانگلہ کے لوگ اپنے وزیر اعظم کو دیکھنے کے منتظر ہیں جنہوں نے ایک محنتی سیاستدان کی شہرت حاصل کی ہے۔انہوں نے کہا کہ جس طرح مسلم لیگ ن کی عوامی رابطہ مہم جاری ہے، بدھ کو صوابی میں ایک اور عوامی اجتماع ہو گا اور اس سے بھی وزیر اعظم خطاب کریں گے۔مسلم لیگ ن کے رہنما نے کہا کہ پچھلی حکومت گزشتہ 4 سالوں کے دوران اپنے وعدوں کو پورا کرنے میں ناکام رہی ہے اور عوام کو قرضوں کے بوجھ تلے دبا دیا ہے۔