اسلام آباد (آئی پی ایس )تقریب تقسیم اعزازات برائے نمایاں کامیاب طلبہ امتحاناتِ سالانہ 2026 وفاقی نظامتِ تعلیم کے زیرِ اہتمام امتحاناتِ سالانہ 2026 میں نمایاں کامیابی حاصل کرنے والے طلبہ و طالبات کے اعزاز میں تقریبِ تقسیمِ اعزازات جمعرات، 29 اکتوبر 2026 کو اسلام آباد ماڈل کالج برائے طالبات، اسٹریٹ 25، ایف-6/2، اسلام آباد میں منعقد ہوئی۔
اس پروقار تقریب کا مقصد مئی 2026 میں منعقد ہونے والے فیڈرل بورڈ آف انٹرمیڈیٹ اینڈ سیکنڈری ایجوکیشن کے امتحانات میں غیر معمولی تعلیمی کارکردگی کا مظاہرہ کرنے والے طلبہ و طالبات کی حوصلہ افزائی اور ان کی کامیابیوں کا اعتراف کرنا تھا۔
تقریب کی مہمانِ خصوصی رابعہ نسیم فاروقی، پارلیمانی سیکرٹری، وزارتِ وفاقی تعلیم و پیشہ ورانہ تربیت تھیں۔تقریب میں جناب جاوید اقبال مرزا، ڈائریکٹر جنرل، وفاقی نظامتِ تعلیم، وفاقی نظامتِ تعلیم کے افسران، پوزیشن ہولڈر کالجوں کے سربراہان، والدین اور طلبہ و طالبات نے شرکت کی۔تقریب کا آغاز تلاوتِ کلامِ پاک اور نعتِ رسولِ مقبول ۖ سے ہوا۔
محترمہ رفعت جبین، ڈائریکٹر اکیڈمکس، وفاقی نظامتِ تعلیم نے امتحاناتِ سالانہ 2026 کے نتائج کا خلاصہ پیش کیا، جس میں مجموعی کارکردگی، کامیابی کے تناسب اور طلبہ و اداروں کی نمایاں کامیابیوں کو اجاگر کیا گیا۔ انہوں نے طلبہ، اساتذہ، پرنسپلز اور والدین کی کاوشوں کو سراہتے ہوئے نمایاں کامیابی حاصل کرنے والے طلبہ کو مبارک باد پیش کی۔
انہوں نے 2025 تا 2026 کے دوران فیڈرل بورڈ آف انٹرمیڈیٹ اینڈ سیکنڈری ایجوکیشن کے زیرِ اہتمام بین الکلیاتی مقابلہ جات میں وفاقی نظامتِ تعلیم کی غیر معمولی کارکردگی کا بھی ذکر کیا۔ انہوں نے بتایا کہ ہم نصابی سرگرمیوں میں نمایاں کامیابیوں کی بنیاد پر وفاقی نظامتِ تعلیم کو تمام نظامتوں میں بہترین نظامت قرار دیا گیا۔ ان کے مطابق یہ نتائج تمام متعلقہ فریقین کے عزم، محنت اور باہمی تعاون کا مظہر ہیں۔
تقریب میں پرائمری سیکشن کے باصلاحیت طلبہ و طالبات نے ایک رنگا رنگ ٹیبلو پیش کیا، جس نے تقریب کی رونق اور دلکشی میں اضافہ کیا۔اس موقع پر جناب جاوید اقبال مرزا، ڈائریکٹر جنرل، وفاقی نظامتِ تعلیم نے مہمانِ خصوصی محترمہ رابعہ نسیم فاروقی کا پرتپاک خیرمقدم کیا اور تقریب میں شرکت پر ان کا شکریہ ادا کیا۔
انہوں نے تقریب کے منظم، باوقار اور خوش اسلوبی سے انعقاد پر محترمہ پروفیسر عالیہ درانی، پرنسپل، اسلام آباد ماڈل کالج برائے طالبات، اسٹریٹ 25، ایف-6/2، اسلام آباد کی کاوشوں کو بھی سراہا۔ڈائریکٹر جنرل نے نمایاں کامیابی حاصل کرنے والے طلبہ و طالبات کی محنت، عزم، نظم و ضبط اور ثابت قدمی کو خراجِ تحسین پیش کیا۔
انہوں نے اساتذہ کی مخلصانہ رہنمائی اور محنت کو طلبہ کی کامیابی میں اہم قرار دیا اور پرنسپلز و ادارہ جاتی قیادت کی ان کوششوں کو سراہا جن کے نتیجے میں طلبہ کو سیکھنے کے لیے مثبت اور معاون ماحول میسر آیا۔ انہوں نے تعلیمی برتری کے ساتھ جسمانی نشوونما اور ہم نصابی سرگرمیوں میں نمایاں کارکردگی کی اہمیت پر زور دیتے ہوئے امید ظاہر کی کہ مستقبل میں وفاقی نظامتِ تعلیم مزید بہتر نتائج حاصل کرے گی۔
انہوں نے طلبہ کی کامیابیوں کو تسلیم کرنے اور ان کی حوصلہ افزائی کے لیے ایسی بامقصد تقریب کے انعقاد پر وفاقی نظامتِ تعلیم کو بھی مبارک باد پیش کی۔تقریب کے دوران ہیومینیٹیز، پری میڈیکل، پری انجینئرنگ، سائنس جنرل/آئی سی ایس اور کامرس گروپس میں نمایاں پوزیشن حاصل کرنے والے طلبہ و طالبات میں نقد انعامات اور اعزازی شیلڈز تقسیم کی گئیں۔
