پورٹو(آئی پی ایس )گلوبل یوتھ امپیکٹ سمٹ پرتگال کے شہر پورٹو-گایا میں اختتام پذیر ہوگئی، جس میں 45 سے زائد قومیتوں کی نمائندگی کرنے والے 50 سے زیادہ نوجوان مندوبین نے شرکت کی اور پائیدار ترقی، عالمی تعاون اور فیصلہ سازی میں نوجوانوں کی موثر شمولیت کے عزم کا اعادہ کیا۔کونسل فار گلوبل افیئرز اینڈ ڈویلپمنٹ کے زیر اہتمام چار روزہ سمٹ 3 سے 6 ستمبر تک پورٹو-گایا کے ہالیڈے اِن ہوٹل میں منعقد ہوئی۔ اجلاس میں افریقہ، امریکا، ایشیا پیسیفک، یورپ اور مشرق وسطی سے ابھرتے ہوئے نوجوان رہنماں، سفارت کاروں، سول سوسائٹی کے نمائندوں، کاروباری شخصیات، ماہرین، جدت کاروں اور اساتذہ نے شرکت کی۔سمٹ کا اہم نتیجہ پورٹو یوتھ ڈیکلریشن کی منظوری اور دستخط تھے، جس پر 50 سے زائد نوجوان مندوبین نے دستخط کیے۔ اعلامیے میں اقوام متحدہ کے پائیدار ترقی کے اہداف کے فروغ اور عالمی چیلنجز سے نمٹنے کے لیے نوجوانوں کے کردار کو مزید موثر بنانے کے عزم کا اظہار کیا گیا۔
اعلامیے میں موسمیاتی تبدیلی سے نمٹنے، تعلیم، معاشی مواقع، صنفی مساوات، شمولیت اور قیامِ امن پر خصوصی توجہ دی گئی، جبکہ عالمی مسائل کے حل میں نوجوانوں کی بامعنی شرکت کی اہمیت کو اجاگر کیا گیا۔سمٹ کے دوران نوجوان رہنماں کو سفارت کاروں اور عالمی ماہرین کے ساتھ براہِ راست تبادلہ خیال کا موقع بھی ملا۔ شرکا میں پرتگال میں بیلجیئم کے سفیر بارٹ لیمینز، کوسوو کی سفیر ڈاکٹر ایڈونا مالوکو بیردینا اور پرتگال میں فلپائن کے سفیر پال ریمنڈ پی۔ کورٹیس نمایاں تھے۔امریکا سے تعلق رکھنے والی ہارورڈ ایمرجنگ لیڈر ایلیسن رینو، جو GYIS 2026 کی صدر بھی ہیں، نے سمٹ میں اہم کردار ادا کیا۔شرکا نے SDG لیڈرشپ فریم ورک کی بھی توثیق کی، جس کے تحت 17 پائیدار ترقی کے اہداف میں سے نو اہداف کو نوجوانوں کی قیادت میں عملی اقدامات کے لیے ترجیح دی گئی۔ فریم ورک میں پالیسی سازی اور فیصلہ سازی کے عمل میں نوجوانوں کی زیادہ مثر شرکت پر زور دیا گیا۔سمٹ کی انوویشن لیب میں کاروباری سرگرمیوں، سماجی اداروں کے درمیان شراکت داری اور ٹیکنالوجی پر مبنی حل کے ذریعے ترقیاتی چیلنجز سے نمٹنے کے امکانات پر بھی غور کیا گیا۔
سمٹ کے اختتام پر ایلیسن رینو نے کہا کہ GYIS 2026 نے دنیا بھر سے مختلف پس منظر رکھنے والی آوازوں کو ایک پلیٹ فارم پر اکٹھا کیا، جو مثبت تبدیلی کے مشترکہ عزم سے متحد ہیں۔کونسل فار گلوبل افیئرز اینڈ ڈویلپمنٹ نے پورٹو یوتھ ڈیکلریشن کو محض ایک دستاویز کے بجائے ایک ایسی تحریک قرار دیا جو 45 سے زائد ممالک کے نوجوانوں کی آواز کی نمائندگی کرتی ہے اور ایک منصفانہ اور پائیدار دنیا کے قیام کے لیے مشترکہ جدوجہد کا عکاس ہے۔منتظمین نے اعلان کیا کہ گلوبل یوتھ امپیکٹ سمٹ 2027 فرانس کے دارالحکومت پیرس میں منعقد ہوگی، جس کے ذریعے سرحدوں سے بالاتر نوجوان قیادت کو جوڑنے اور پائیدار ترقی کے لیے نوجوانوں کی قیادت میں اقدامات کو فروغ دینے کا سلسلہ جاری رکھا جائے گا۔پورٹو سمٹ نے اس سے قبل استنبول میں منعقدہ یوتھ فورم آن گلوبل گولز کے ذریعے شروع ہونے والے نوجوانوں کی قیادت میں عالمی مکالمے کو مزید آگے بڑھایا۔ سمٹ میں اس امر کی بھی توثیق کی گئی کہ نوجوان عالمی چیلنجز کے حل کی تشکیل میں جدت کاروں، کاروباری افراد، محققین، کمیونٹی رہنماں اور فعال شراکت داروں کے طور پر بڑھتا ہوا کردار ادا کر رہے ہیں۔
