اسلام آباد، (سب نیوز) : چینی سفارتخانے اسلام آباد اور انسٹی ٹیوٹ آف ریجنل اسٹڈیز (آئی آر ایس) کے زیر اہتمام ’’شی جن پنگ کی پارٹی سازی سے متعلق فکر‘‘ کے موضوع پر خصوصی بریفنگ کا انعقاد کیا گیا، جس میں کمیونسٹ پارٹی آف چائنا (سی پی سی) کے مرکزی کمیٹی کے بین الاقوامی شعبے (آئی ڈی سی پی سی) کے ماہرین کے وفد نے بھی شرکت کی۔
تقریب سے خطاب کرتے ہوئے پاکستان میں چین کے سفیر جیانگ زائی ڈونگ نے آئی آر ایس کے ساتھ مل کر اس موضوع پر بریفنگ کے انعقاد پر خوشی کا اظہار کیا۔
چینی سفیر نے کہا کہ چینی صدر شی جن پنگ اور پاکستانی قیادت نئی صدی میں پاک چین تعلقات کی اہمیت کے حوالے سے مشترکہ فہم رکھتے ہیں، جبکہ چینی صدر پاکستان کے ساتھ دوطرفہ تعلقات کو انتہائی اہمیت دیتے ہیں۔
انہوں نے کہا کہ ’’شی جن پنگ کی پارٹی سازی سے متعلق فکر‘‘ ایک جامع اور گہری فکر ہے، جس پر کمیونسٹ پارٹی آف چائنا میں بھرپور طریقے سے عملدرآمد کیا گیا ہے۔ یہ فکر پارٹی کی تعمیر اور چین کی جدید کاری کے فروغ کے لیے بنیادی رہنمائی فراہم کرتی ہے۔
جیانگ زائی ڈونگ نے کہا کہ کمیونسٹ پارٹی آف چائنا اور پاکستان کی سیاسی جماعتوں کا مشترکہ مقصد اپنے عوام کے لیے بہتر زندگی اور زیادہ خوشحالی یقینی بنانا ہے۔ انہوں نے کہا کہ سی پی سی کی قیادت میں چین نے غربت کے خاتمے کی جنگ میں کامیابی حاصل کی۔
انہوں نے کہا کہ چینی خصوصیات کے حامل سوشلزم کی ایک نمایاں خصوصیت کمیونسٹ پارٹی کی قیادت ہے، جس نے چینی عوام کو جدید کاری کے فروغ اور ایک عظیم سوشلسٹ ملک کی تعمیر کی جانب گامزن کیا ہے۔
چینی سفیر نے چین پاکستان تعاون میں عوام پر مرکوز سوچ کو اجاگر کرتے ہوئے کہا کہ چین پاکستان اقتصادی راہداری (سی پیک) کے تحت پاکستان میں اربوں ڈالر کی براہ راست سرمایہ کاری، روزگار کے مواقع اور سینکڑوں میگاواٹ بجلی پیدا کرنے کی صلاحیت میں اضافہ ہوا ہے۔
انہوں نے کہا کہ چین صدر شی جن پنگ، صدر آصف علی زرداری اور وزیراعظم محمد شہباز شریف کے درمیان طے پانے والے اہم اتفاق رائے پر عملدرآمد، سی پیک 2.0 کو آگے بڑھانے اور عوامی فلاح و بہبود پر مبنی مزید منصوبے شروع کرنے کے لیے پاکستان کے ساتھ کام کرنے کو تیار ہے۔
جیانگ زائی ڈونگ نے کہا کہ چین پارٹی سازی اور قومی حکمرانی کے حوالے سے پاکستانی سیاسی جماعتوں کے ساتھ تبادلے مزید مضبوط بنانے اور پاکستان کے ترقیاتی تجربات سے سیکھنے کے لیے تیار ہے۔ انہوں نے واضح کیا کہ کمیونسٹ پارٹی آف چائنا اپنا طریقہ کار دوسرے ممالک پر مسلط نہیں کرتی بلکہ سیاسی جماعتوں کے درمیان باہمی سیکھنے اور تعاون کی حمایت کرتی ہے۔
انہوں نے کہا کہ چین اور پاکستان اپنی سیاسی جماعتوں اور مسلح افواج کے درمیان تعاون کو مزید مضبوط بناتے ہوئے دونوں ممالک کے عوام کے لیے مزید فوائد یقینی بنانے کے لیے مشترکہ کوششیں جاری رکھیں گے۔
تقریب سے خطاب کرتے ہوئے چیئرمین سینیٹ سید یوسف رضا گیلانی نے ’’شی جن پنگ کی پارٹی سازی سے متعلق فکر‘‘ پر خصوصی بریفنگ کے لیے کمیونسٹ پارٹی آف چائنا کے وفد کی پاکستان آمد کا خیرمقدم کیا۔
انہوں نے کہا کہ پاکستان میں چین کے ساتھ دوستی کو قومی اتفاق رائے حاصل ہے اور یہ تقریب پارٹی سازی اور طرز حکمرانی کے شعبوں میں باہمی سیکھنے کا قیمتی موقع فراہم کرے گی۔
یوسف رضا گیلانی نے کہا کہ پاکستان چین کے ساتھ دیرینہ دوستی کو انتہائی قدر کی نگاہ سے دیکھتا ہے اور چین کی شاندار تبدیلی اور ترقیاتی کامیابیوں سے سیکھنے کے لیے ہونے والے تبادلوں کا خیرمقدم کرتا ہے۔
انہوں نے کہا کہ شی جن پنگ کی پارٹی سازی سے متعلق فکر کو وسیع پیمانے پر پذیرائی حاصل ہوئی ہے اور اس بریفنگ سے دونوں ممالک کی سیاسی جماعتوں کے درمیان تعاون اور باہمی مفاہمت کو مزید فروغ ملے گا۔
چیئرمین سینیٹ نے کہا کہ پاکستان اور چین کے درمیان اقتصادی، ثقافتی، تعلیمی اور طبی شعبوں میں روابط میں مسلسل اضافہ ہو رہا ہے، جبکہ دونوں ممالک کے عوام اور سیاسی قیادت کی بھرپور حمایت سے دوطرفہ تعلقات مزید مستحکم ہو رہے ہیں۔
انہوں نے کمیونسٹ پارٹی آف چائنا کو اس کی 105ویں سالگرہ پر مبارکباد دیتے ہوئے پارٹی کی قیادت میں چین کی ترقیاتی کامیابیوں کو اجاگر کیا اور کہا کہ پاک چین تعلقات مضبوط رفتار کے ساتھ آگے بڑھ رہے ہیں۔
انہوں نے کہا کہ سی پیک ترقی اور دوستی کی علامت بن کر سامنے آیا ہے جبکہ مختلف شعبوں میں تعاون دونوں ممالک کے عوام کے لیے نئے مواقع پیدا کر رہا ہے۔
اس موقع پر دورہ کرنے والے کمیونسٹ پارٹی آف چائنا کے حکام نے کہا کہ چینی کمیونسٹ پارٹی اپنی 105ویں سالگرہ منا رہی ہے اور یہ دنیا کی سب سے بڑی سیاسی جماعتوں میں سے ایک ہے، جس کے ارکان کی تعداد 10 کروڑ سے زیادہ ہے اور عالمی سطح پر اس کا نمایاں اثر و رسوخ ہے۔
انہوں نے کہا کہ کمیونسٹ پارٹی آف چائنا کی 18ویں قومی کانگریس کے بعد پارٹی نے خود احتسابی اور پارٹی نظم و نسق کے حوالے سے نئے تصورات اور طریقہ کار متعارف کرائے، جو چین کی جدید کاری کے لیے قابل قدر تجربہ فراہم کرتے ہیں اور عالمی ترقی کے لیے چینی دانش میں اضافہ کرتے ہیں۔
چینی عہدیدار نے کہا کہ ہر ملک کو اپنی تاریخ، ثقافت اور قومی حالات کے مطابق ترقی کا راستہ اختیار کرنا چاہیے، جس کا بنیادی مقصد عوام کو بہتر زندگی فراہم کرنا اور وسیع عوامی حمایت حاصل کرنا ہو۔
انہوں نے کہا کہ کمیونسٹ پارٹی آف چائنا نے پارٹی کی داخلی حکمرانی کو مضبوط بنایا، کھلے پن اور مکالمے کو فروغ دیا اور دنیا بھر میں 800 سے زائد سیاسی جماعتوں کے ساتھ روابط قائم رکھے ہیں۔
چینی عہدیدار نے پاکستان اور چین کو اچھے بھائی قرار دیتے ہوئے کہا کہ کمیونسٹ پارٹی آف چائنا پاکستانی سیاسی جماعتوں کے ساتھ مل کر انسانیت کے مشترکہ مستقبل کی حامل برادری کی تعمیر کے لیے کام کرنے کو تیار ہے۔
