جدہ(خالد نواز چیمہ)جدہ کی ممتاز کاروباری، سماجی اور سیاسی حلقوں میں قدر کی نگاہ سے دیکھی جانے والی شخصیت چوہدری ارشد نے پاکستان جرنلسٹس فورم اور پاکستان مسلم لیگ کے اپنے دیرینہ ساتھیوں کے اعزاز میں ایک شاندار اور پرتکلف عشائیے کا اہتمام کیا، جو صرف ایک دعوت نہیں بلکہ حب الوطنی، سیاسی یکجہتی اور پاک سعودی دوستی کے عزم کی بھرپور ترجمانی بن گیا۔تقریب میں پاکستان جرنلسٹس فورم کے اراکین کے علاوہ پاکستانی کمیونٹی کی نمایاں سیاسی و کاروباری شخصیات نے بھرپور شرکت کی، جن میں چیئرمین انوسٹر فورم و سابق مشیر وزیر اعلی پنجاب چوہدری اظہر عباس وڑائچ مسلم لیگ کے چیئرمین چوہدری اکرم گجر، مرکزی راہنما مسلم لیگ، نور آرائیں، چوہدری فاروق انجم، چوہدری وحید اور معروف سرمایہ کار چوہدری محمد شریف شامل تھے۔
خطاب کرتے ہوئے چوہدری ارشد نے جذبات سے بھرپور انداز میں کہا کہ اوورسیز پاکستانی صرف ترسیلات زر نہیں بھیجتے بلکہ وہ وطن کی معیشت، دفاع اور وقار کے محافظ ہیں۔ انہوں نے کہا کہ آج جب پاکستان کو معاشی استحکام کی اشد ضرورت ہے، بیرون ملک مقیم پاکستانی خاموش مجاہد بن کر ملکی خزانے کو مضبوط بنا رہے ہیں۔انہوں نے پاک سعودی تعلقات کو امتِ مسلمہ کا روشن استعارہ قرار دیتے ہوئے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کی پاکستان سے والہانہ محبت کو خراجِ تحسین پیش کیا اور کہا کہ سعودی قیادت نے ہر مشکل گھڑی میں پاکستان کا ہاتھ تھاما ہے۔ چوہدری ارشد نے دونوں ممالک کی قیادت کی درازیِ عمر اور پاک سعودی دوستی کے دوام کے لیے خصوصی دعا کی۔انہوں نے پاک سعودی تجارت کو وسعت دینے کے لیے قابلِ عمل تجاویز پیش کرتے ہوئے کہا کہ اگر سرمایہ کاروں کو سہولیات دی جائیں تو اوورسیز پاکستانی اربوں ڈالر وطن لا سکتے ہیں۔
مہمانوں نے چوہدری ارشد کو ایک محبِ وطن سرمایہ کار قرار دیتے ہوئے ان کی خدمات کو سراہا اور اس امید کا اظہار کیا کہ وہ آئندہ بھی پاکستان کے لیے زیادہ سے زیادہ زرمبادلہ کمانے اور نوجوان نسل کو کاروبار کی جانب راغب کرنے میں اپنا کردار ادا کرتے رہیں گے۔اس موقع پر چوہدری ارشد کے صاحبزادے علی شہزادہ اور سعود شہزادہ نے اپنے کاروباری منصوبوں پر روشنی ڈالتے ہوئے بتایا کہ وہ پاکستان اور سعودی عرب کے درمیان تجارتی تعلقات کو مضبوط بنانے کے مشن پر گامزن ہیں۔تقریب کے اختتام پر وطنِ عزیز کی سلامتی، افواجِ پاکستان کے عظیم شہدا کے درجات کی بلندی، کشمیر و فلسطین کی آزادی، ملک کی ترقی و خوشحالی اور امتِ مسلمہ کے اتحاد کے لیے رقت آمیز اجتماعی دعا کرائی۔
