اسلام آباد /برلن،وزیر خارجہ مخدوم شاہ محمود قریشی وفد کے ہمراہ جرمنی کے دو روزہ سرکاری دورے پر برلن پہنچ گئے، برلن ہوائی اڈے پر جرمنی میں تعینات پاکستانی سفیر ڈاکٹر محمد فیصل ، جرمنی کی وزارتِ خارجہ کے اعلی حکام اور سفارتخانے کے سینئر افسران نے وزیر خارجہ کا خیر مقدم کیا۔
اس موقع پر وزیر خارجہ نے کہا کہ جرمنی دنیا کی اہم اقتصادی اور سیاسی قوت ہے،جرمنی کے ساتھ پاکستان کی وابستگی، تاریخی نوعیت کی ہے، مفکر پاکستان حضرت ڈاکٹر علامہ محمد اقبال نے نہ صرف یہاں اعلی تعلیمی مراحل مکمل کئے بلکہ انہوں نے گوئٹے اور “فریڈرک نیچے “جیسے عظیم دانشوروں کی فکر سے بھی استفادہ کیا ،پاکستان کی یورپی ممالک کے ساتھ ہونے والی دو طرفہ تجارت کے حجم میں سب سے زیادہ حصہ جرمنی کا ہے۔وزیر خارجہ مخدوم شاہ محمود قریشی برلن میں اپنے جرمن ہم منصب ہائیکو ماس کے ساتھ وفود کی سطح پر مذاکرات کریں گے ،ان مذاکرات میں دو طرفہ تعلقات میں اضافے کے ساتھ ساتھ، دو طرفہ اقتصادی و تجارتی تعاون کے میسر مواقعوں اور کثیرالجہتی شعبہ جات میں دو طرفہ تعاون کو آگے بڑھانے کے حوالے سے تفصیلی تبادلہ خیال کیا جائے گا ،وزیر خارجہ برلن میں جرمن پارلیمان کے صدر جناب وولف گانگ شوئبلے سے بھی ملاقات کریں گے اور دو طرفہ پارلیمانی روابط کے فروغ کے حوالے سے تبادلہ خیال کریں گے ،وزیر خارجہ پاکستانی سفارتخانے کا دورہ کریں گے اور جرمنی میں مقیم پاکستانی کمیونٹی سے ملاقات کریں گے ۔جرمنی پہنچنے پر ایئرپورٹ پر صحافیوں سے گفتگو کرتے ہوئے شاہ محمود قریشی نے کہا کہ مجھے خوشی ہے کہ میں جرمنی کے دارالحکومت برلن پہنچا ہوںایک لاکھ سے زائد پاکستانی جرمنی میں قیام پذیر ہیں اور یہاں بہت مثبت کردار ادا کر رہے ہیں، معاشی سفارت کاری اور ٹیکنالوجی کے تبادلے کو ہم آگے بڑھانا چاہتے ہیں، اس حوالے سے یہاں کی قیادت سے بات چیت ہو گی ، ہم چاہتے ہیں جرمنی کے ساتھ پارلیمانی سطح پر ہمارے تعلقات میں وسعت آئے پہلے سے موجود “فرینڈشپ گروپس” مزید فعال ہوں۔
