الجزائر(آئی پی ایس )الجزائر کے صدر عبدالمجید تبون نے یکم نومبر 1954 کے عظیم آزادی انقلاب کی 72ویں سالگرہ کے موقع پر اپنے پیغام میں کہا ہے کہ الجزائر کی آزادی، خودمختاری اور قومی شناخت کے تحفظ کے لیے لاکھوں شہدا کی قربانیاں ہمیشہ زندہ رہیں گی، جبکہ یکم نومبر کا دن الجزائر کی تاریخ میں ایک فیصلہ کن اور ناقابل فراموش سنگِ میل کی حیثیت رکھتا ہے۔
صدر تبون نے اپنے پیغام میں کہا کہ الجزائر کی قوم اس تاریخی دن کو شہدا کی عظیم قربانیوں کی یاد اور قومی فخر و وقار کے جذبے کے ساتھ منا رہی ہے۔ انہوں نے کہا کہ الجزائر کے عوام نے 130 سال سے زائد عرصے تک نوآبادیاتی قبضے، اپنی سرزمین پر تسلط، تاریخ کو مسخ کرنے اور قومی شناخت مٹانے کی کوششوں کا سامنا کیا۔انہوں نے کہا کہ الجزائر میں فرانسیسی آبادکار نوآبادیاتی نظام نے اخلاقی اصولوں اور تہذیبی اقدار کی سنگین خلاف ورزیاں کیں، جو انسانی تاریخ پر ایک بدنما داغ ہیں۔
ملک کا کوئی خطہ ایسا نہیں جہاں نوآبادیاتی جرائم کے اثرات اور مزاحمت کی داستانیں موجود نہ ہوں۔ الجزائر کے مختلف علاقوں میں مزاحمت کی تحریکیں یکے بعد دیگرے اٹھتی رہیں، یہاں تک کہ یکم نومبر 1954 کو آزادی کی عظیم تحریک کا آغاز ہوا۔صدر عبدالمجید تبون نے کہا کہ آزادی کے ان مجاہدین نے مشکلات، ظلم و ستم، گرفتاریوں اور قید و بند کی صعوبتیں برداشت کرتے ہوئے آزادی کی جدوجہد کو جاری رکھا اور بالآخر ایک ایسی تاریخی تحریک کا آغاز کیا جس نے الجزائر کی آزادی کی بنیاد رکھی۔
انہوں نے کہا کہ الجزائر کے عوام نے اپنی سرزمین کو آزاد اور خودمختار دیکھنے کے لیے بے مثال جانی قربانیاں دیں اور یوں یکم نومبر کا پیغام ہمیشہ کے لیے امر ہوگیا۔صدر نے کہا کہ لاکھوں شہدا کی قربانیوں سے وجود میں آنے والا الجزائر حقیقی قوم پرستی، قومی اتحاد اور مضبوط ریاستی اداروں کی علامت ہے۔ 72ویں سالگرہ ہمیں اپنے اسلاف کی جدوجہد سے عزم و حوصلہ حاصل کرنے اور قومی مفادات کے تحفظ کے تقاضوں کا ادراک کرنے کا موقع فراہم کرتی ہے۔
انہوں نے مزید کہا کہ موجودہ علاقائی حالات کے تناظر میں الجزائر اپنے قومی سلامتی کے تقاضوں، اہم مفادات اور استحکام کے تحفظ کے لیے پیشگی حکمت عملی اور ادارہ جاتی ہم آہنگی کو بنیادی اہمیت دیتا ہے۔ اس سلسلے میں ایک برادر اور ہمسایہ ملک کے ساتھ آئینی اختیار اور ادارہ جاتی اتفاقِ رائے کے تحت تعاون الجزائر کے اہم قومی مفادات کے تحفظ اور خطے میں استحکام برقرار رکھنے کی حکمت عملی کا حصہ ہے۔صدر تبون نے واضح کیا کہ الجزائر اپنی خودمختار سیاسی پالیسی اور قومی فیصلوں کے ذریعے ملک کے وسائل اور صلاحیتوں کو ترقی، خوشحالی اور استحکام کے لیے بروئے کار لا رہا ہے، جو یکم نومبر کے انقلابی نظریات اور قومی خودمختاری کے جذبے سے ہم آہنگ ہے۔
پیغام کے اختتام پر صدر عبدالمجید تبون نے شہدا کی ارواح کے لیے مغفرت کی دعا کرتے ہوئے سابق مجاہدین، بالخصوص خواتین مجاہدات اور آزادی کے ہیروز کو خراجِ تحسین پیش کیا اور ان کی صحت، درازی عمر اور خوشحالی کے لیے دعا کی۔ انہوں نے اپنے پیغام کا اختتام ان الفاظ پر کیا: الجزائر زندہ باد، ہمارے عظیم شہدا کے لیے ابدی سربلندی اور سلامتی۔
