اسلام آباد(سب نیوز)ہندوستان کے ساتھ حالیہ تنازع میں پاکستان کی مسلح افواج کی غیر معمولی بہادری کو خراج تحسین پیش کرتے ہوئے زرعی ترقیاتی بینک لمٹیڈ نے ہیڈ آفس میں کیک کاٹنے کی تقریب کا انعقاد کیا اور چاروں صوبائی دارالحکومتوں میں اپنی عمارتوں کو روشن کیا۔یوم تشکر کے سلسلے میں زیڈ ٹی بی ایل کے علاقائی دفاتر میں پاکستان بھر میں تقریبات کا انعقاد کیا گیا۔
تقریبات کی قیادت زیڈ ٹی بی ایل کے صدر طاہر یعقوب بھٹی نے کی، جنہوں نے سینئر انتظامیہ کے ساتھ مل کر ہماری بہادر مسلح افواج کے حق میں نعرے بلند کئے اور کیک بھی کاٹا۔ اس موقع پر اللہ اکبر اور پاکستان ہمیشہ زندہ باد کے فلک شگاف نعرے لگائے گئے۔طاہر بھٹی نے کہا کہ بھارت کے ساتھ حالیہ تنازع نے ایک عالمی بحث کو جنم دیا ہے کہ اگر ٹیکنالوجی کم پیشہ ور افراد کے ذریعے چلائی جائے تو یہ بیکار ہے۔ پاکستانی جیٹ فائٹرز نے یہ ثابت کر دیا۔ ہمارے پیشہ ور پائلٹس نے جدید ترین ٹیکنالوجی کو پیچھے چھوڑ دیا۔
اس موقع پر شرکا نے عزم کیا کہ پاکستان حیرت انگیز کام کرسکتا ہے کیونکہ ٹیلنٹ کی کوئی کمی نہیں ہے۔ انہوں نے کہا کہ ہم یوم تشکر اس لیے مناتے ہیں کہ ہم نے اپنی طاقت سے 10گنا بڑی طاقت کو شکست دی، کیونکہ ہم یقین رکھتے ہیں کہ مطلق طاقت اللہ تعالی کے علاوہ کسی اور کو حاصل نہیں ہے۔
