وزیراعظم محمد شہباز شریف نے مردان کے قریب پاک فضائیہ کا تربیتی طیارہ گرنے کے افسوسناک حادثے پر گہرے دکھ اور افسوس کا اظہار کیا ہے۔
وزیراعظم نے حادثے میں پاک فضائیہ کے فلائٹ لیفٹیننٹ محمد قاسم عبداللہ اور پاک بحریہ کے لیفٹیننٹ طٰہٰ عباسی کی شہادت پر تعزیت کرتے ہوئے کہا کہ یہ واقعہ انتہائی افسوسناک ہے اور پوری قوم اس دکھ کی گھڑی میں شہداء کے اہل خانہ کے ساتھ کھڑی ہے۔
انہوں نے شہداء کے درجات کی بلندی کے لیے دعا کرتے ہوئے کہا کہ ہم اللہ تعالیٰ سے دعا گو ہیں کہ وہ شہداء کو اپنی جوار رحمت میں جگہ عطا فرمائے۔
وزیراعظم نے شہداء کے اہل خانہ سے دلی ہمدردی اور تعزیت کا اظہار کرتے ہوئے کہا کہ اللہ تعالیٰ لواحقین کو یہ صدمہ برداشت کرنے کا حوصلہ اور صبر جمیل عطا فرمائے۔
انہوں نے مزید کہا کہ پاک افواج وطن کے دفاع کے لیے اپنی پیشہ ورانہ مہارت اور خدمات میں بے مثال ہیں، اور پوری قوم ان کی قربانیوں کو قدر کی نگاہ سے دیکھتی ہے۔
