فرانس نے پاکستان کی جانب سے بھارتی رافیل کو مار گرانے کی تصدیق کردی

اسلام آباد (سب نیوز)اعلی فرانسیسی انٹیلی جنس عہدیدار نے پاکستان کی جانب سے بھارتی فضائیہ کا ایک رافیل لڑاکا طیارہ مار گرانے کی تصدیق کردی۔
واضح رہے کہ بھارت نے منگل اور بدھ کی درمیانی شب پاکستان کے 6 شہروں میں 20 سے زائد مقامات پر میزائل حملے کیے، جس میں تقریبا 30 پاکستانی شہری شہید اور 45 سے زائد زخمی ہوئے۔پاکستان کی جانب سے بھارتی جارحیت کا بھرپور جواب دیتے ہوئے رافیل سمیت بھارت کے 5 طیارے تباہ کئے گئے جبکہ فورسز نے 7 ڈرون بھی مار گرائے۔
اعلی فرانسیسی انٹیلی جنس عہدیدار نے اب امریکی نشریاتی ادارے سی این این کو تصدیق کی ہے کہ پاکستان نے بھارتی فضائیہ کا ایک رافیل لڑاکا طیارہ مار گرایا ہے جو فرانس میں تیار کردہ اس جدید جنگی طیارے کا پہلی بار جنگ میں نقصان ہے۔فرانسیسی حکام اس بات کی بھی تحقیقات کر رہے ہیں کہ کیا پاکستان نے راتوں رات ایک سے زیادہ رافیل طیاروں کو نشانہ بنایا۔
یاد رہے کہ بھارتی حکومت نے تاحال اس معاملے پر کوئی ردعمل ظاہر نہیں کیا تاہم، بھارت کے زیر انتظام کشمیر میں گرنے والے طیارے کے ملبے میں فرانسیسی کمپنی کا لیبل دیکھا گیا۔رافیل ایک 10 ٹن وزنی، دوہری انجن والا جدید ملٹی رول لڑاکا طیارہ ہے جو 30 ملی میٹر توپ، ایئر ٹو ایئر میزائل، لیزر گائیڈڈ بم، اور کروز میزائل سے لیس ہوتا ہے۔حالیہ کشیدگی سے قبل بھارت کے پاس 36 رافیل طیارے تھے جو فرانس سے خریدے گئے تھے۔
اس سے قبل نیویارک ٹائمز نے بھی تصدیق کی ہے کہ پاکستان نے بھارت کا رافیل طیارہ مار گرایا جس کا ملبہ بھی مل گیا ہے اور اخبار کا کہنا ہے کہ ثبوتوں سے واضح ہے کہ آپریشن میں بھارت کو بھاری نقصان اٹھانا پڑا۔