اسحاق ڈار کا پاناما اور ڈنمارک کے وزرائے خارجہ سے رابطہ، خطے کی صورتحال سے آگاہ کیا

اسلام آباد(سب نیوز)وزیر خارجہ اسحاق ڈار نے پاناما کے وزیر خارجہ ہاویئر ایڈورڈو مارٹنز اچا واسکیز سے ٹیلی فونک گفتگو کی اور انہیں خطے کی موجودہ علاقائی صورتحال سے آگاہ کیا۔
وزارت خارجہ کے مطابق وزیر خارجہ اسحاق ڈار نے بھارت کے اشتعال انگیز پراپیگنڈے، پاکستان کے خلاف اس کے غیر قانونی یک طرفہ اقدامات اور بھارت کے سندھ طاس معاہدے سے الگ ہونے کے اعلان اور بین الاقوامی قوانین کی صریح خلاف ورزی سے متعلق آگاہ کیا۔ترجمان دفتر خارجہ کے مطابق پاناما کے وزیر خارجہ نے دونوں فریقوں کو تحمل کا مظاہرہ کرنے پر زور دیا۔ترجمان کے مطابق اقوام متحدہ کی سلامتی کونسل کے غیر مستقل رکن ہونے کے ناطے، دونوں فریقوں نے بین الاقوامی امن اور سلامتی کے لیے اپنے عزم کا اعادہ کیا۔
دریں اثنا وزیر خارجہ اسحاق ڈار اور ڈنمارک کے وزیر خارجہ لارس لوکے راسموسن کی ٹیلی فون پر بات چیت ہوئی۔ وزیر خارجہ نے بدلتی ہوئی علاقائی صورتحال اور بھارت کے بے بنیاد الزامات سے آگاہ کیا۔ترجمان دفتر خارجہ کے مطابق یک طرفہ اور اشتعال انگیز اقدامات کے جواب میں پاکستان نے قومی سلامتی کمیٹی کے اقدامات کے بارے میں آگاہ کیا، سندھ طاس معاہدے کو التوا میں رکھنے کے بھارت کے فیصلے کو سختی سے مسترد کیا۔ترجمان کے مطابق بات چیت میں دونوں فریقوں کی جانب سے تحمل کا مظاہرہ کرنے کی اہمیت پر زور دیا گیا۔ دونوں رہنماں نے علاقائی اور عالمی پیش رفت پر قریبی رابطہ برقرار رکھنے اور دوطرفہ تعاون کو مضبوط بنانے پر بھی اتفاق کیا۔