آئی ٹی ایف ٹینس ماسٹرز ورلڈ ٹیم چیمپئن شپ، پاکستان نے 45پلس کیٹیگری میں سلور میڈل حاصل کر لیا

اسلام آباد (سب نیوز)پاکستان نے آئی ٹی ایف ٹینس ماسٹرز ورلڈ ٹیم چیمپئن شپ میں شاندار کارکردگی کا مظاہرہ کرتے ہوئے 45 پلس کیٹیگری میں سلور میڈل حاصل کر لیا۔چیمپئن شپ کے فائنل میں پاکستان کو ٹاپ سیڈ اور ٹورنامنٹ کی فیورٹ ٹیم اسپین کے ہاتھوں سخت مقابلے کے بعد 2-1 سے شکست کا سامنا کرنا پڑا۔فیصلہ کن دوسرے سنگلز مقابلے میں پاکستان کے عقیل خان کو اسپین کے فرانسسکو جیویئر مارٹینیز بینا نے 6-4، 6-2 سے شکست دی۔
عقیل خان نے ٹورنامنٹ کے دوران سنگلز اور ڈبلز میں شاندار کھیل پیش کیا اور اعصام الحق قریشی کے ساتھ مل کر کئی اہم کامیابیاں حاصل کیں۔پاکستان نے فائنل تک رسائی کے سفر میں امریکا، کینیڈا، میزبان پرتگال اور سویڈن کے خلاف متاثر کن فتوحات حاصل کیں اور چیمپئن شپ کے پوڈیم پر جگہ بنائی۔
جیمور ٹینس سینٹر میں منعقدہ میڈل تقریب میں پاکستان کو سلور میڈلز اور رنرز اپ ٹرافی دی گئی۔ تقریب میں انٹرنیشنل ٹینس فیڈریشن کے صدر اور پرتگالی ٹینس فیڈریشن کے صدر نے پاکستانی ٹیم کو اعزازات سے نوازا جبکہ پرتگال میں پاکستان کے لیے پرتگال کے سفیر پالو ڈومنگیز نے بھی تقریب میں شرکت کی۔پاکستان کا سلور میڈل آئی ٹی ایف ماسٹرز ورلڈ ٹیم چیمپئن شپ میں ملک کی اب تک کی بہترین کارکردگی ہے جو ٹیم کے عزم، کھیلوں کے جذبے، اتحاد اور شاندار کارکردگی کا ثمر ہے۔