اسلام آباد (آئی پی ایس )اسپیکر قومی اسمبلی سردار ایاز صادق نے بنوں میں بھارتی حمایت یافتہ خوارج دہشت گردوں کے خلاف کامیاب کارروائی پر سیکیورٹی فورسز کی پیشہ ورانہ مہارت، جرات اور بروقت اقدام کو سراہتے ہوئے انہیں زبردست خراجِ تحسین پیش کیا ہے۔
اسپیکر سردار ایاز صادق نے مثر کارروائی کے دوران پانچ دہشت گردوں کو ہلاک کرنے اور خودکش حملہ آور کے ناپاک عزائم ناکام بنانے پر سیکیورٹی فورسز کی کارکردگی کو قابلِ فخر قرار دیا۔
اسپیکر قومی اسمبلی نے آپریشن کے دوران جامِ شہادت نوش کرنے والے لیفٹیننٹ کرنل شہزادہ گل فراز اور سپاہی کرامت شاہ کو زبردست خراجِ عقیدت پیش کرتے ہوئے کہا کہ قوم کے بہادر سپوتوں نے مادرِ وطن کے دفاع میں اپنی جانوں کا نذرانہ پیش کر کے قوم کا سر فخر سے بلند کر دیا ہے۔ اسپیکر سردار ایاز صادق نے شہدا کے اہلِ خانہ سے تعزیت اور دلی ہمدردی کا اظہار کرتے ہوئے کہا کہ پوری قوم ان کے غم میں برابر کی شریک ہے۔ اسپیکر قومی اسمبلی نے کہا کہ قوم اپنے بہادر جوانوں کی عظیم قربانیوں کو ہمیشہ یاد رکھے گی۔
اسپیکر سردار ایاز صادق نے کہا کہ انٹیلیجنس بیسڈ آپریشنز سمیت دہشت گردی کے خلاف کارروائیاں ملک سے دہشت گردی کے مکمل خاتمے تک جاری رہیں گی۔ دہشت گردی کے خلاف اس قومی جدوجہد میں پاکستانی قوم اپنی سیکیورٹی فورسز کے شانہ بشانہ کھڑی ہے۔ اسپیکر قومی اسمبلی سردار ایاز صادق نے اللہ تعالی سے شہدا کے درجات کی بلندی اور ان کے لواحقین کو صبرِ جمیل عطا فرمانے کی دعا کی۔
