اسلام آباد (آئی پی ایس )سول و پولیس افسران کی گریڈ 18سے 19میں ترقیوں کیلئے ڈیپارٹمنٹل سلیکشن بورڈ کا اجلاس موخر کر دیا گیا ہے، اسٹیبلشمنٹ ڈویژن کی جانب سے جاری کردہ باضابطہ نوٹیفکیشن کے مطابق 3فروری کا اجلاس منسوخ کر کے نئی تاریخ 13فروری مقرر کی گئی ہے۔
نوٹیفکیشن کے مطابق وفاقی حکومت کے تحت افسران کی گریڈ 18سے 19میں ترقیوں کیلئے رواں ماہ 3فروری کو طلب کردہ ڈیپارٹمنٹل سلیکشن بورڈ کا اجلاس موخر کر دیا گیا ہے۔ پاکستان ایڈمنسٹریٹو سروس، پولیس سروس آف پاکستان، آفس مینجمنٹ گروپ اور ایکس کیڈر کے افسران کی بی ایس 18 سے بی ایس 19 میں ترقی کیلئے طے شدہ ڈیپارٹمنٹل سلیکشن بورڈ (ڈی ایس بی)کے اجلاس کی تاریخ تبدیل کر دی گئی ہے۔ اسٹیبلشمنٹ ڈویژن کے مطابق، 3فروری 2026 کو ہونے والا اجلاس اب 13 فروری 2026 (جمعہ)صبح 11بجے اسٹیبلشمنٹ ڈویژن میں منعقد ہوگا
اجلاس کی تاریخ میں تبدیلی کی وجہ بورڈ کے کچھ ارکان کی جانب سے ذاتی طور پر شرکت کی خواہش کے باوجود ناگزیر مصروفیات کی بنا پر موجود نہ ہونے کی صورت حال بتائی گئی ہے، یہ اجلاس ڈیپارٹمنٹل سلیکشن بورڈ کے چیئرمین، سیکریٹری اسٹیبلشمنٹ ڈویژن ڈویژن اسلام آباد کی سربراہی میں ہو گا۔ اجلاس میں تمام صوبوں کے چیف سیکریٹریز، انسپکٹر جنرلز آف پولیس، اسٹیبلشمنٹ ڈویژن کے ایڈیشنل سیکرٹریز، قانون و انصاف وزارت کے ایڈیشنل سیکرٹری اور دیگر متعلقہ سیکریٹریز بطور ارکان شرکت کریں گے، نوٹیفکیشن میں تمام متعلقہ ارکان اور محکموں کو نئی تاریخ پر معلومات اور شرکت کو یقینی بنانے کی ہدایت کی گئی ہے۔
