عمران خان سے اب فیملی کی ملاقاتیں بھی بند ہونگی،فیصل واوڈا کا چیف آف ڈیفنس فورسز کے نوٹیفکیشن سے متعلق قیاس آرائیاں کرنے والوں کو سخت پیغام

اسلام آباد(سب نیوز)سینیٹر فیصل واوڈا نے چیف آف ڈیفنس فورسز کی تقرری کے نوٹیفکیشن سے متعلق قیاس آرائیاں کرنے والوں کو سخت پیغام دے دیا۔فیصل واوڈا نے سوشل میڈیا پلیٹ فارم ایکس پر جاری اپنے پیغام میں عمران خان سے اڈیالہ جیل میں ان کی فیملی اور وکلا کی ملاقاتوں کا ذکر کیا۔
انہوں نے کہا کہ ذہنی مریض، اندھے اور بہرے آئین و قانون کے مطابق سن لیں فیملی کی ملاقات صرف حال احوال کیلئے ہوگی جبکہ وکیل کو کیس سے متعلق ملنے کی اجازت ہے۔سابق وفاقی وزیر نے کہا کہ فیملی کی ملاقاتیں بھی سیاسی ہو رہی ہیں اب سے وہ بھی بند کر دی جائیں گی، اگر وکلا نے کیس کے علاوہ کوئی سیاسی پیغام دیا تو وہ ملاقات بھی بند کر دی جائیں گی۔
جیتی ہوئی افواج اور سپہ سالار کے بارے میں مزید بکواس برداشت نہیں کی جائے گی۔ بکواس کرنے والوں کی زبان سے جوتے کا سول بنا دیا جائیگا۔ بلا جواز عدم استحکام اور فوج کو بدنام کرنے کی سازش ذہنی گندگی ہے جسے روکا جائے گا۔پیار کے بدلے ڈبل پیار، عزت کے مطابق ڈبل عزت لیکن بدمعاشی کا جواب ڈبل بدمعاشی سے دیا جائے گا۔ اشتعال کرنے والی پارٹی اس دوراہے پر لے آئی ہے کہ واپسی اب مشکل ہے، اب کیسز اور چیزوں کو منطقی انجام تک پہنچایا جائے گا۔ وزیر اعلی خیبر پختونخوا سہیل آفریدی نے انچ برابر کوئی مزید ہڑا ہڑی کی تو بچی کچی سیاست گورنر راج سے ختم کر دی جائے گی، 9 مئی کے جو دہشتگرد کے پی میں چھپے ہوئے ہیں ان سمیت سب اپنی خیر منائیں۔
چیف آف ڈیفنس فورسز کی تقرری کے نوٹیفکیشن کے بارے میں فیصل واوڈا نے کہا کہ نوٹیفکیشن نوٹیفکیشن کرنے والوں کو کہہ دیا تھا جلد آ رہا ہے، تیاری کر لیں۔پی ٹی آئی والے عمران خان کو اس مقام پر لے جا رہے ہیں جہاں سے واپسی نہیں ہوگی، جو بھی ملاقات کے بعد سیاسی گفتگو کریں گے ملاقاتیں بند ہو جائیں گی، یہ لوگ اس جگہ پر لے آئے ہیں جہاں سے واپسی نہیں ہوگی۔فیصل واوڈا نے مزید کہا کہ دو تین روز میں نوٹیفکیشن بھی آ جائے گا جس کیلئے غلط باتیں کی جا رہی ہیں، اب یہ کچھ بھی کریں گے تو گورنر راج لگا کر ان کا پھینٹا لگائیں گے۔