شوشا (سب نیوز)وزیراعظم شہبازشریف اقتصادی تعاون تنظیم (ای سی او)کے سربراہی اجلاس میں شرکت کے لیے آذربائیجان پہنچ گئے۔
تفصیلات کے مطابق وزیرِاعظم شہباز شریف 2 روزہ سرکاری دورے پر آذربائیجان کے شہر شوشا قرہ باغ پہنچ گئے، جہاں وہ اقتصادی تعاون تنظیم کے سربراہی اجلاس میں شرکت کریں گے۔فذوالی ہوائی اڈے پر آذربائیجان کے وزیر ثقافت عادل کرملی اور اعلی حکام نے وزیراعظم شہباز شریف اور پاکستانی وفد کا پرتپاک استقبال کیا۔اقتصادی تعاون تنظیم کے سربراہی اجلاس میں وزیراعظم شہباز شریف عالمی اور علاقائی امور پر پاکستان کا نقطہ نظر پیش کریں گے۔نائب وزیراعظم اسحاق ڈار، وزیر اطلاعات عطا اللہ تارڑ اور معاون خصوصی طارق فاطمی بھی وزیراعظم شہباز شریف کے ہمراہ ہیں۔وزیرِ اعظم اقتصادی تعاون تنظیم کے سربراہی اجلاس سے خطاب بھی کریں گے اور سربراہی اجلاس میں شریک عالمی رہنماوں سے اہم ملاقاتیں بھی کریں گے۔
دوسری طرف وزیراعظم شہباز شریف سے پاکستان میں سعودی عرب کے سفیر نواف بن سعید المالکی نے ملاقات کی۔ ملاقات میں نائب وزیراعظم و وزیر خارجہ اسحاق ڈار سمیت دیگر وزرا بھی شریک تھے۔ وزیراعظم نے حرمین شریفین کے متولی شاہ سلمان بن عبدالعزیز اور سعودی ولی عہد شہزادہ محمد بن سلمان کے لیے نیک تمناوں کا اظہار کیا۔ انہوں نے مشرق وسطی میں قیام امن کے لیے سعودی عرب کی مفاہمتی کوششوں کو سراہا، خصوصا پاک بھارت تعلقات میں بہتری کے لیے سعودی کردار کی تعریف کی۔وزیراعظم نے اس موقع پر آگاہ کیا کہ پاکستان نے جولائی 2025 کے مہینے کے لیے اقوام متحدہ کی سلامتی کونسل کی صدارت سنبھال لی ہے۔ سعودی سفیر نے خطے میں قیام امن اور استحکام کے لیے پاکستان کے مثبت کردار کو سراہا اور مکمل تعاون کا یقین دلایا۔
