خواتین ریڈ لائن، تشدد یا ظلم کسی صورت برداشت نہیں: مریم نواز

لاہور: وزیراعلیٰ پنجاب مریم نواز نے کہا ہے کہ خواتین میری ریڈ لائن ہیں، خواتین پر تشدد یا ظلم قطعاً برداشت نہیں۔
خواتین کے خلاف تشدد کے خاتمے کے عالمی دن پر اپنے پیغام میں وزیر اعلیٰ پنجاب مریم نواز کا کہنا تھا کہ ماؤں، بہنوں اور بیٹیوں کی عزت معاشرتی روایات اور مذہبی اقدار ہیں ، دین اسلام میں پہلی مرتبہ عورت کو مکمل عزت و احترام اور حقوق دینے کے احکامات دئیے گئے، بیٹیوں اور بہنوں سمیت خواتین کی عزت و احترام نبی کریمؐ کی سنت ہے ۔
انہوں نے کہا کہ قرآن وسنت میں عورت پر ہاتھ اٹھانے سے نہ صرف منع کیا گیا بلکہ نرمی برتنے کا بھی حکم دیا گیا ہے، خواتین پر تشدد کرنے والے بزدل اورمجرم ہیں، آہنی ہاتھوں سے نمٹا جائے گا، خواتین کا تحفظ حکومت پنجاب کی اولین ترجیح ہے، پنجاب کو پہلی بار ورچوئل ویمن پولیس اسٹیشن قائم کرنے کا اعزاز حاصل ہے۔
مریم نواز کا کہنا تھا کہ مشکل کی شکار خواتین اپنی شکایات ورچوئل ویمن پولیس اسٹیشن میں درج کرا سکتی ہیں، خواتین کسی ہنگامی صورتحال میں پنک بٹن سے فوری پولیس ہیلپ حاصل کر سکتی ہیں، خواتین کے لیے پولیس ویمن ہیلپ لائن بھی مکمل فعال ہے۔
وزیراعلیٰ نے مزید کہا کہ حکومت پنجاب خواتین کے تحفظ اور حقوق کی پاسداری کے لیے پر عزم ہے، خواتین کے لئےتشدد سے پاک، محفوظ اور مساوی معاشرہ ترقی کی ضمانت ہے۔