واشنگٹن(آئی پی ایس )صدارتی انتخاب جیتنے کے بعد ڈونلڈ ٹرمپ نے وائٹ ہاس میں پہلی بڑی تقرری کا فیصلہ کرلیا۔غیر ملکی میڈیا کے مطابق ڈونلڈ ٹرمپ نے اپنی انتخابی مہم کی مینیجر اور ان کی جیت میں اہم کردار ادا کرنے والی سوزن وائلز کو وائٹ ہاوس میں چیف آف اسٹاف مقرر کرنے کا فیصلہ کیا ہے۔
رپورٹ کے مطابق 67 سالہ سوزن وائلز پہلی خاتون ہوں گی جنہیں وائٹ ہاوس میں چیف آف اسٹاف بننے کا اعزاز حاصل ہوگا۔وائٹ ہاوس کے چیف آف اسٹاف کی پوسٹ انتہائی اہمیت کی حامل ہوتی ہے کیونکہ یہ عہدہ صدر کی انتظامیہ میں اہم کردار ادا کرتا ہے۔
چیف آف اسٹاف، وائٹ ہاوس کی انتظامیہ کو منظم انداز میں کام کروانے کا ذمہ دار ہوتا ہے اور ان کی نگرانی کرتا ہے۔ چیف آف اسٹاف امریکی صدر کی مصروفیات کا شیڈول بھی طے کرتا ہے اور دیگر حکومتی اور انتظامی اداروں سے رابطہ کروانے والے کا کردار بھی ادا کرتا ہے۔
