اسلام آباد (سب نیوز) — پاکستان میں ایتھوپیا کے سفیر ڈاکٹر عمر ایچ اوبا اور علامہ اقبال اوپن یونیورسٹی کے وائس چانسلر پروفیسر ڈاکٹر ناصر محمود نے جمعرات کو یونیورسٹی کے احاطے میں ایتھوپیا کے گرین لیگیسی انیشی ایٹو کا افتتاح کیا۔
اس اقدام کا مقصد پودے لگا کر پاکستان اور ایتھوپیا کے درمیان دوستی، باہمی تعاون اور برادرانہ تعلقات کو فروغ دینا ہے۔
اس موقع پر ایتھوپیا کے سفیر نے یونیورسٹی کے اساتذہ کے ساتھ ایک تعاملی نشست بھی کی، جس میں انہوں نے گرین لیگیسی انیشی ایٹو کی اہمیت اجاگر کرتے ہوئے کہا کہ یہ اقدام ماحولیاتی تبدیلیوں سے نمٹنے، جنگلات کے رقبے میں اضافے، غذائی تحفظ اور سرسبز معیشت کے فروغ میں اہم کردار ادا کر سکتا ہے۔
سفیر ڈاکٹر عمر ایچ اوبا نے شرکاء کو پاکستان اور ایتھوپیا کے تاریخی تعلقات، ایتھوپیا کی تیزی سے ترقی کرتی معیشت، آبادیاتی امکانات، ثقافت اور سیاحت کی صلاحیتوں کے بارے میں بھی آگاہ کیا۔
انہوں نے سائنسی اور فنی تعلیم، زرعی علوم میں مشترکہ تحقیق اور اساتذہ و طلبہ کے تبادلے کے پروگراموں سمیت مختلف شعبوں میں تعاون کے فروغ کے لیے ادارہ جاتی روابط قائم کرنے پر زور دیا۔
سفیر نے ایتھوپیا میں جاری تعلیمی انقلاب، تعلیمی اداروں کی بڑھتی ہوئی تعداد اور شرح خواندگی میں اضافے کا ذکر کرتے ہوئے علمی حلقوں پر زور دیا کہ وہ دونوں ممالک کے دوطرفہ تعلقات کو مضبوط بنانے میں اپنا کردار ادا کریں۔
علامہ اقبال اوپن یونیورسٹی کے وائس چانسلر پروفیسر ڈاکٹر ناصر محمود نے ایتھوپیا کی سماجی و اقتصادی ترقی کو سراہتے ہوئے دونوں ممالک کے دیرینہ تعلقات کو اجاگر کیا اور تعلیمی شعبے میں دوطرفہ تعاون کے فروغ کے عزم کا اعادہ کیا۔
انہوں نے افریقی ممالک، بالخصوص ایتھوپیا کے ساتھ تعلقات مضبوط بنانے کے لیے حکومت پاکستان کے عزم کی بھی توثیق کی۔
نشست کے اختتام پر دونوں فریقین نے ایتھوپیا کی متعلقہ جامعات اور علامہ اقبال اوپن یونیورسٹی کے درمیان ادارہ جاتی روابط قائم کرکے دوطرفہ تعلقات اور تعلیمی تعاون کو مزید آگے بڑھانے کے عزم کا اظہار کیا۔
