چوہدری محمد افضل مبشر چیمہ کی جانب سے معزز مہمانوں کے اعزاز میں عشائیہ، پاک سعودی تعلقات اور سعودی عرب کی مثالی ترقی پر اظہارِ خیال

جدہ (خالد نواز چیمہ): چیئرپرسن وزیراعلیٰ پنجاب ٹاسک فورس آن اسکلز ڈویلپمنٹ اور رکن پنجاب اسمبلی چوہدری عدنان افضل چٹھہ کے بھائی چوہدری عرفان افضل چٹھہ اور ڈی سی کالونی گوجرانوالہ کے امیدوار برائے نائب صدر چوہدری اسلم پرویز ملہی عمرے کی سعادت حاصل کرنے کے لیے سعودی عرب تشریف لائے، جہاں پاکستان بیت المال کے چیئرمین، عوامی نمائندے اور سعودی عرب کی معروف کاروباری، سیاسی و سماجی شخصیت چوہدری محمد افضل مبشر چیمہ نے ان کے اعزاز میں پرتکلف عشائیے کا اہتمام کیا۔
تقریب میں گوجرانوالہ، راہوالی، گکھڑ منڈی، علی پور چٹھہ اور وزیرآباد سے تعلق رکھنے والی معزز شخصیات اور دوست احباب نے شرکت کی۔ شرکاء نے معزز مہمانوں کو عمرے کی سعادت حاصل کرنے اور روضۂ رسول ﷺ کی زیارت کی سعادت پر دلی مبارکباد پیش کی۔
اس موقع پر گفتگو کرتے ہوئے معزز مہمانوں نے کہا کہ پاکستان اور سعودی عرب کے تعلقات محض سفارتی یا معاشی روابط تک محدود نہیں بلکہ دونوں برادر ممالک کے عوام کے درمیان محبت، عقیدت اور اخوت کا ایک مضبوط رشتہ قائم ہے۔ سعودی عرب ہمیشہ پاکستانی عوام کے دلوں میں خصوصی مقام رکھتا ہے اور پاکستانی کمیونٹی سعودی عرب کی ترقی میں اپنا کردار ادا کرنے پر فخر محسوس کرتی ہے۔
مقررین نے سعودی عرب کی تیز رفتار ترقی، جدید انفراسٹرکچر، امن و امان، شاندار شہری سہولیات اور دنیا بھر سے آنے والے عازمینِ عمرہ و زائرین کے لیے فراہم کی جانے والی غیر معمولی خدمات کو سراہا۔ انہوں نے کہا کہ خادم حرمین شریفین کی قیادت میں سعودی عرب نے حجاج و معتمرین کی سہولت، رہائش، ٹرانسپورٹ، صحت، سکیورٹی اور جدید ٹیکنالوجی کے شعبوں میں نمایاں پیش رفت کی ہے، جس کا مشاہدہ دنیا بھر سے آنے والے زائرین خود کرتے ہیں۔
انہوں نے کہا کہ سعودی عرب کا وژن 2030 ترقی، روزگار، سرمایہ کاری، سیاحت، ٹیکنالوجی اور انسانی وسائل کی ترقی کے نئے مواقع پیدا کر رہا ہے، جبکہ مکہ مکرمہ اور مدینہ منورہ میں زائرین کے لیے سہولیات میں مسلسل بہتری اس بات کا واضح ثبوت ہے کہ سعودی قیادت مہمانانِ حرم کی خدمت کو خصوصی اہمیت دیتی ہے۔
تقریب میں پنجاب کی ترقی اور عوامی فلاح کے حوالے سے بھی گفتگو ہوئی۔ شرکاء نے کہا کہ وزیراعلیٰ پنجاب کی جانب سے تعلیم، ہنرمندی، نوجوانوں کے لیے روزگار کے مواقع، انفراسٹرکچر، صحت اور عوامی سہولیات کے شعبوں میں شروع کیے جانے والے منصوبے صوبے کے نوجوانوں کو آگے بڑھنے کے مواقع فراہم کرنے کی سمت اہم اقدامات ہیں۔ خصوصاً اسکلز ڈویلپمنٹ کے ذریعے نوجوان نسل کو جدید مارکیٹ کی ضروریات کے مطابق تربیت فراہم کرنا وقت کی اہم ضرورت ہے، جس سے روزگار اور معاشی خودمختاری کے نئے راستے کھل سکتے ہیں۔
شرکاء نے اس امر کو بھی سراہا کہ سعودی عرب میں پاکستانی کمیونٹی کے مختلف طبقات کے درمیان باہمی رابطوں اور پاکستان سے آنے والے مہمانوں کی میزبانی کی خوبصورت روایات برقرار ہیں۔
چوہدری محمد افضل مبشر چیمہ کو یہ اعزاز حاصل ہے کہ وہ پاکستان سے سعودی عرب آنے والے مختلف سیاسی جماعتوں، کاروباری حلقوں اور سماجی شعبوں سے تعلق رکھنے والے مہمانوں کو بلاامتیاز عزت و احترام دیتے اور ان کی بھرپور میزبانی کرتے ہیں۔ ان کی جانب سے منعقد کی جانے والی ایسی تقریبات نہ صرف باہمی روابط کو مضبوط کرتی ہیں بلکہ بیرونِ ملک پاکستانیوں کے درمیان اتحاد، محبت اور وطن سے وابستگی کے جذبے کو بھی اجاگر کرتی ہیں۔
تقریب کے اختتام پر معزز مہمانوں اور شرکاء نے پاکستان اور سعودی عرب کے درمیان دیرینہ برادرانہ تعلقات، باہمی تجارت، سرمایہ کاری اور عوامی روابط میں مزید وسعت کے لیے نیک خواہشات کا اظہار کیا۔