اسلام آباد(سب نیوز) نائب وزیرِ اعظم و وزیرِ خارجہ، سینیٹر محمد اسحاق ڈار نے یومِ استحصال کشمیر کے موقع پر اپنے خصوصی پیغام میں کہا ہے کہ 5 اگست 2019 کو بھارت نے اپنے غیر قانونی طور پر زیرِ قبضہ جموں و کشمیر میں یکطرفہ اور غیر قانونی اقدامات کے ذریعے خطے کی بین الاقوامی سطح پر تسلیم شدہ متنازع حیثیت کو تبدیل کرنے اور کشمیری عوام کے حقوق و امنگوں کو مجروح کرنے کی کوشش کی۔
انہوں نے کہا کہ یہ اقدامات بین الاقوامی قوانین، اقوامِ متحدہ کے منشور اور جموں و کشمیر سے متعلق اقوامِ متحدہ کی سلامتی کونسل کی متعلقہ قراردادوں کی صریح خلاف ورزی ہیں، جن کے نتیجے میں مقبوضہ جموں و کشمیر کے عوام کو درپیش مشکلات میں مزید اضافہ ہوا ہے۔
نائب وزیراعظم نے کہا کہ پاکستان آج یومِ استحصال کشمیر منا کر مقبوضہ جموں و کشمیر کے ثابت قدم عوام کے ساتھ اپنی مکمل یکجہتی کا اظہار کر رہا ہے۔ انہوں نے کہا کہ کشمیری عوام اپنے جائز حقِ خودارادیت کے حصول کے لیے مسلسل قربانیاں دے رہے ہیں اور پاکستان ان کے بنیادی حقوق کے لیے اپنی غیر متزلزل حمایت کا اعادہ کرتا ہے۔
اسحاق ڈار نے کہا کہ 5 اگست 2019 کے اقدامات اور اس کے بعد کیے جانے والے یکطرفہ فیصلے نہ صرف باعثِ تشویش ہیں بلکہ انہوں نے جنوبی ایشیا میں امن و استحکام کی کوششوں کو بھی مزید پیچیدہ بنا دیا ہے۔
انہوں نے بین الاقوامی برادری، بالخصوص اقوامِ متحدہ، پر زور دیا کہ وہ بین الاقوامی قانون، بین الاقوامی انسانی قانون، انسانی حقوق اور اقوامِ متحدہ کے فریم ورک کے تحت کیے گئے وعدوں کے احترام کو یقینی بنانے کے لیے مؤثر کردار ادا کرے۔
انہوں نے کہا کہ پاکستان مسلسل بھارت سے مطالبہ کرتا آ رہا ہے کہ وہ ایسے تمام غیر قانونی اقدامات سے باز رہے جو جموں و کشمیر کی بین الاقوامی طور پر تسلیم شدہ متنازع حیثیت کے منافی ہیں، اور ایسے اقدامات کرے جو تنازع کے پُرامن حل کے لیے سازگار ماحول پیدا کرنے میں مددگار ثابت ہوں۔
نائب وزیراعظم نے اپنے پیغام میں کہا کہ جنوبی ایشیا میں پائیدار امن اور استحکام صرف اسی صورت ممکن ہے جب جموں و کشمیر کے تنازع کو کشمیری عوام کی خواہشات اور اقوامِ متحدہ کی سلامتی کونسل کی متعلقہ قراردادوں کے مطابق حل کیا جائے۔
انہوں نے اس عزم کا اعادہ کیا کہ پاکستان ہر بین الاقوامی فورم پر کشمیری عوام کے حقوق کے لیے اپنی آواز بلند کرتا رہے گا اور تنازع کے منصفانہ، پُرامن اور پائیدار حل کے لیے کی جانے والی تمام کوششوں کی حمایت جاری رکھے گا۔
اسحاق ڈار نے کشمیری عوام کی ثابت قدمی، جرأت اور عظیم قربانیوں کو خراجِ تحسین پیش کرتے ہوئے کہا کہ پاکستان ان کے ساتھ اپنی غیر متزلزل یکجہتی کا اعادہ کرتا ہے اور کشمیری عوام کے جائز حقِ خودارادیت کے حصول کی منصفانہ جدوجہد کے لیے اپنی اخلاقی، سیاسی اور سفارتی حمایت ہر سطح پر جاری رکھے گا۔
انہوں نے بین الاقوامی برادری، خصوصاً اقوامِ متحدہ، پر زور دیا کہ وہ اپنی طویل عرصے سے زیرِ التوا ذمہ داریوں کو پورا کرے اور جموں و کشمیر کے تنازع کے پُرامن حل کے لیے بامعنی اور مؤثر اقدامات کرے۔
