شمالی قبرص ترک جمہوریہ خودمختار ریاست کے طور پر تسلیم کیے جانے اور مساوی بین الاقوامی حیثیت کا خواہاں ہے، وزیر محنت و سماجی تحفظ اوغوزہان حاصب اوغلو

اسلام آباد(سب نیوز) شمالی قبرص ترک جمہوریہ کے وزیر محنت و سماجی تحفظ، اوغوزہان حاصب اوغلو نے اسلامی تعاون تنظیم کے رکن ممالک میں خواتین کے کردار سے متعلق نویں وزارتی کانفرنس کے موقع پر اسلام آباد میں پاکستانی میڈیا کے نمائندوں سے ملاقات کی۔ملاقات کے دوران وزیر اوغوزہان حاصب اوغلو نے مسئلہ قبرص پر شمالی قبرص ترک جمہوریہ کے موقف کی وضاحت کرتے ہوئے خودمختار برابری اور ترک قبرصی عوام کی مساوی بین الاقوامی حیثیت کے اصولوں پر زور دیا۔
انہوں نے کہا کہ شمالی قبرص ترک جمہوریہ کے عوام ایک خودمختار ریاست کے طور پر بین الاقوامی سطح پر تسلیم کیے جانے کے خواہاں ہیں اور انہیں عالمی برادری میں اپنی نمائندگی کا حق حاصل ہونا چاہیے۔انہوں نے اسلامی ممالک کے ساتھ شمالی قبرص ترک جمہوریہ کے بڑھتے ہوئے تعلقات کا ذکر کرتے ہوئے مسلم دنیا کے ساتھ تعاون کو مزید مضبوط بنانے کی ضرورت پر زور دیا۔ وزیر نے شمالی قبرص ترک جمہوریہ کے معاملے پر پاکستان کے تعمیری اور مثبت موقف کو سراہا اور شمالی قبرص میں مقیم پاکستانی برادری کے مثبت کردار کو بھی خراجِ تحسین پیش کیا۔
وزیر اوغوزہان حاصب اوغلو نے مشرقِ وسطی کی موجودہ صورتحال پر بھی اپنے خیالات کا اظہار کرتے ہوئے کہا کہ خطے میں امن، استحکام اور مشترکہ چیلنجز سے نمٹنے کے لیے او آئی سی کے رکن ممالک کے درمیان مکالمے اور باہمی تعاون کو فروغ دینا ناگزیر ہے۔اس ملاقات نے پاکستانی صحافیوں اور وزیر اوغوزہان حاصب اوغلو کے درمیان علاقائی اور بین الاقوامی اہمیت کے مختلف امور پر تعمیری اور مفید تبادلہ خیال کا موقع فراہم کیا۔