اسلام آباد(آئی پی ایس )اسلام آباد میں کیوبا کے سفارت خانے اور پاکستان میں کیوبا سے اظہارِ یکجہتی کرنے والی مختلف تنظیموں نے کیوبا کے انقلابی رہنما اور سابق صدر فیڈل کاسترو روز کی پیدائش کی سوویں سالگرہ کی مناسبت سے تقریبات کا باقاعدہ آغاز کر دیا۔ اس سلسلے میں فیڈل: یکجہتی کی محرک قوت کے عنوان سے ایک ورکشاپ کا انعقاد کیا گیا، جبکہ یہ تقریبات اگست تک جاری رہیں گی۔
تقریب میں پاکستان میں تعینات سفارتی برادری کے ارکان نے شرکت کی، جن میں ویتنام کے سفیر، جنوبی افریقہ کے ہائی کمشنر اور روسی سفارت خانے کے حکام شامل تھے۔ اس کے علاوہ پاکستان-کیوبا سوشل فورم، کیوبا سے تعلیم یافتہ پاکستانی ڈاکٹروں کی ایسوسی ایشن، فیڈریشن آف پروگریسیو اسٹوڈنٹس، دانشوروں، کاروباری شخصیات اور ایسے نوجوان پاکستانی بھی شریک ہوئے جنہیں کیوبا میں میڈیکل کی تعلیم کے لیے منتخب کیا گیا ہے۔
تقریب کا آغاز پاکستان میں کیوبا کے سفیر دامیان کورڈیرو کے خطاب سے ہوا۔ انہوں نے کہا کہ یہ موقع فیڈل کاسترو کی شخصیت اور خدمات کو خراجِ عقیدت پیش کرنے کے ساتھ ساتھ اقوام متحدہ میں امریکہ کی جانب سے کیوبا پر عائد اقتصادی پابندیوں کے خلاف عالمی برادری کی حالیہ حمایت پر اظہارِ تشکر کا بھی ہے۔ انہوں نے اس موقع پر کیوبا کے دوست ممالک کے نمائندوں کا خصوصی شکریہ ادا کیا۔
سفیر نے فیڈل کاسترو کے ہمہ جہت ورثے پر روشنی ڈالتے ہوئے خاص طور پر ان کے نظریہ یکجہتی اور دنیا کے دور دراز علاقوں میں کیوبا کے طبی و انسانی امدادی مشنز کے ذریعے اس کے عملی اظہار کو اجاگر کیا۔
ورکشاپ کے مرکزی مقرر ڈاکٹر صہیب حیدر، صدر ایسوسی ایشن آف پاکستانی ڈاکٹرز گریجویٹ اِن کیوبا، تھے۔ انہوں نے کیوبا میں اپنے تعلیمی تجربات بیان کرتے ہوئے کہا کہ وہاں انہیں صرف طب ہی نہیں بلکہ انسان دوستی، خدمت اور سماجی ذمہ داری جیسے اعلی اقدار بھی سیکھنے کا موقع ملا۔ تقریب کے دوران مختلف یکجہتی تنظیموں کے نمائندوں نے کیوبا سے اظہارِ یکجہتی کو مزید مثر بنانے کے طریقوں پر بھی تبادلہ خیال کیا۔
اس موقع پر معروف فلم ساز روبرٹو چیلے کی دستاویزی فلم آن دی ہلزائیڈز آف دی ہمالایاز بھی دکھائی گئی، جس نے شرکا کو جذباتی طور پر متاثر کیا۔ فلم میں 2005 کے پاکستان کے تباہ کن زلزلے کے بعد کیوبا کے ہنری ریو طبی دستے کی جانب سے پاکستانی پہاڑی علاقوں میں فراہم کی جانے والی طبی اور انسانی خدمات کو اجاگر کیا گیا ہے۔ تقریب کا اختتام مشہور نغمے لا گوانتانامیرا کی منفرد موسیقی پیش کرنے اور اجتماعی یادگاری تصویر کے ساتھ ہوا، جس نے اس حقیقت کو اجاگر کیا کہ فیڈل کاسترو آج بھی کیوبا ہی نہیں بلکہ دنیا بھر کے انصاف پسند عوام کے لیے ایک متاثر کن شخصیت کی حیثیت رکھتے ہیں۔
