اسلام آباد(آئی پی ایس) چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا نے ایمرجنسی اینڈ ڈیزاسٹر مینجمنٹ ہیڈ کوارٹرز کا اچانک دورہ کیا، جہاں انہوں نے ایمرجنسی اور ہنگامی حالات میں تیاریوں کا تفصیلی جائزہ لیا۔
اس موقع پر ممبر ایڈمن سی ڈی اے طلعت محمود بھی ان کے ہمراہ تھے۔ دورے کے دوران چیئرمین کو فائر اینڈ ریسکیو کی جامع مشق کا مظاہرہ پیش کیا گیا، جس میں آگ سے بچاؤ کے سامان اور فائر فائٹرز کی عملی کارکردگی کا جائزہ لیا گیا۔
چیئرمین سی ڈی اے محمد علی رندھاوا نے کہا کہ سی ڈی اے کے فائر فائٹرز اپنی جانوں کو خطرے میں ڈال کر عوام کی جان و مال کی حفاظت کے لیے ہر لمحہ تیار ہیں۔ انہوں نے فائر فائٹرز کی خدمات، پیشہ ورانہ تربیت اور آگ پر قابو پانے کی صلاحیتوں کو سراہا اور ان کی بے لوث کاوشوں کو خراجِ تحسین پیش کیا۔
انہوں نے کہا کہ ایمرجنسی اینڈ ڈیزاسٹر مینجمنٹ کی تیاریوں اور صلاحیتوں کو بین الاقوامی معیار کے مطابق ڈھالا جا چکا ہے۔ سی ڈی اے نے عوام کے تحفظ کے لیے ایک عالمی معیار کی فائر فائٹنگ فورس تشکیل دی ہے۔
چیئرمین سی ڈی اے نے عوامی آگاہی کی اہمیت پر بھی زور دیا اور اس عزم کا اظہار کیا کہ فائر ڈپارٹمنٹ کو تمام ضروری وسائل اور تربیت فراہم کی جائے گی تاکہ وہ ہنگامی حالات کے لیے ہر وقت تیار رہیں۔
