اسلام آباد(پریس ریلیز)وفاقی ٹیکس محتسب (FTO)عزت مآب،ڈاکٹر آصف محمود جاہ نے ایف بی آر (FBR)کے ایس آر او(SRO) اور پوائنٹ آف سیل(PoS) انضمام کے نفاذ کے خلاف آل پاکستان پرائیویٹ سکولز فیڈریشن کی اپیل منظور کرتے ہوئے ایف بی آر کواعلیٰ سطح کی کمیٹی بنانے اور تعلیمی اداروں کو نوٹسز اجرا کا سلسلہ بند کرنے کی ہدایات جاری کی ہیں، ک
میٹی میں آل پاکستان پرائیویٹ سکولز فیڈریشن کے صدر کاشف مرزا،سینئر نائب صدر ڈاکٹر ملک ابرارحسین اورصوبائی صدر سندھ اخترآرائیں جبکہ ایف بی آر کی نمائندگی ارشد نواز چھینہ اور آصف رسول کریں گے۔تفصیلات کے مطابق آل پاکستان پرائیویٹ سکولز فیڈریشن کی طرف سے مرکزی سنیئرنائب صدر ڈاکٹر ملک ابرارحسین، صوبائی صدور سندھ، اخترآرائیں، پنجاب حسنین مرزا، بلوچستان رشید کاکڑ، اورکے پی کے سلیم خان نے وفاقی ٹیکس محتسب میں دائر کردہ اپیل میں فیڈرل بورڈ آف ریونیو کے SRO-428 (I)/2024 کو واپس لینے کی درخواست کی تھی جس پر ٹیکس محتسب پاکستان نے ایف بی آر کے غیر منصفانہ متنازعہ ایس آر او کو ریٹیلرز کے طور پر درجہ بندی کرنے اور پوائنٹ آف سیل انضمام کو نافذ کرنے کے برخلاف اپیل منظور کرتے ہوئے ایف بی آر کو فیڈریشن کی نمائندگی پر مشتمل ایک اعلیٰ سطح کی کمیٹی بنانے کی ہدایت کی۔
فیڈریشن کے صدر کاشف مرزا،سینئر نائب صدر ڈاکٹرملک ابرار حسین، اخترآرائیں، حسنین مرزا، رشیدکاکڑاور سلیم خان نے اپنے بیان میں کہا ہے کہ اپیل منظور کرکے وفاقی ٹیکس محتسب نے تعلیمی سرپرستی اور آئینی ذمہ داری کو پورا کیاہے جس پر ہم انہیں خراج تحسین پیش کرتے ہیں۔رہنماؤں کا کہنا تھاکہ غیر منصفانہ SRO سکولزکو ریٹیلرز کے طور پر درجہ بندی کرتا ہے اور پوائنٹ آف سیل کو نافذ کرتا ہے،جوآئین کے آرٹیکل 25 اے کیخلاف ورزی ہے، ایس آر او کا نفاذ کم فیس والے سکولز کومتاثر کرے گا جس سے غریب بچوں کی تعلیم متاثر اور عدم مساوات میں اضافہ ہوگا۔ ملک بھرسکولز میں انٹرنیٹ کی دستیابی صرف18فیصد ہے، 12فیصد اساتذہ کے پاس ڈیجیٹل خواندگی ہے، 15فیصد تعلیمی اداروں میں بنیادی کمپیوٹر لیبزہیں، صرف 5فیصد کے پاس تیز رفتار انٹرنیٹ اور ڈیجیٹل ٹولز دستیاب ہیں،کم آمدنی والے سکولز کو آن لائن انضمام کے نوٹسزسے منفی اثرات مرتب ہونگے، ڈراپ آوٹ کی شرح میں اضافہ اور معیاری تعلیمی سکول بند ہو جائیں گے۔فیڈریشن کے رہنماؤں نے مطالبہ کیا ہے کہ حکومت اور FBR فیصلہ فوری واپس لے کر تعلیم کو مکمل ومستقل استثنیٰ اور فروغ تعلیم کو ترجیح دیں۔
