پیٹرول کی قیمتوں میں بڑی کمی کا امکان، عالمی منڈی میں خام تیل سستا ہوگیا

اسلام آباد (سب نیوز)ڈونلڈ ٹرمپ کے دنیا بھر سے تجارتی جنگ چھیڑنے کے دوران ایک اچھی خبر یہ ہے کہ خام تیل کی قیمت میں مسلسل کمی دیکھنے میں آئی ہے۔
عالمی خبر رساں ادارے کے مطابق عالمی منڈی میں خام تیل کی قیمت 60.12 ڈالر فی بیرل پرآن گری ہے۔ یہ کمی فی بیرل 14 ڈالر بنتی ہے۔خیال رہے کہ عالمی منڈی میں برینٹ خام تیل 31 مارچ کو 74.74 ڈالر فی بیرل تھا جو یکم اور2 اپریل تک 74.95 ڈالرفی بیرل تک جا پہنچا تھا۔
تاہم اس کے بعد خام تیل کی قیمتوں میں مسلسل کمی دیکھی گئی ہے جو کم ہوتے ہوتے 74.74 ڈالر سے کم ہو کر 60.12 ڈالر فی بیرل تک آگئی۔ماہرین کا کہنا ہے کہ خام تیل کی قیمتوں میں کمی سے پاکستان میں فی لٹر پیٹرول کی قیمتوں میں 10 سے 12 روپے کی کمی ہوسکتی ہے۔
قبل ازیں حکومت نے پیٹرول کی قیمتوں میں زیادہ کمی نہیں تھی لیکن اس کے بدلے میں حکومت نے بجلی کی قیمتوں میں بڑا ریلیف دینے کا وعدہ پورا کیا تھا۔اب چوں کہ خام تیل کی قیمتوں میں نمایاں کمی واقع ہوئی ہے اس لیے پیٹرول کی قیمتوں میں مزید کمی متوقع ہے۔تاہم ماہرین کا یہ بھی کہنا ہے کہ حکومت پیٹرولیم مصنوعات پر جنرل ٹیکس عائد کرنے کا اپنا اختیار استعمال کرسکتی ہے۔