اسلام آباد:
اسلام آباد ہائی کورٹ میں بانی پی ٹی آئی عمران خان اور بشریٰ بی بی کی توشہ خانہ ٹو کیس میں بریت کے حوالے سے سماعت ہوئی جس میں وکیل سلمان صفدر نے کیس دوسرے بنچ کو منتقل کرنے کی استدعا کردی۔
تفصیلات کے مطابق منگل کو جسٹس انعام این منہاس نے توشہ خانہ ٹو کیس میں عمران خان اور بشریٰ بی بی کی بریت کی درخواستوں پر سماعت کی۔
سماعت کے آغاز میں بانی پی ٹی آئی عمران خان اور بشریٰ بی بی کے وکیل سلمان صفدر نے کیس دوسرے بنچ کو منتقل کرنے کی استدعا کردی۔
سلمان صفدر نے عدالت میں دلائل کا آغاز کرتے ہوئے کہا، ’میں اپنے کلائنٹ کی ہدایات کے مطابق اپنی استدعا رکھتا ہوں۔‘
انہوں نے مزید کہا کہ ’یہ کیس اس ہائیکورٹ کے بہت سینئر جج پہلے ہی سُن چکے ہیں، اور خاور مانیکا نے عِدت کیس میں بریت کے خلاف اپیل دائر کی تھی جس میں انہی گراؤنڈز پر کیس دوسرے بنچ کو منتقل کرنے کا حکم دیا گیا تھا۔‘
سلمان صفدر نے عدالت سے درخواست کی کہ ’میرے پاس تحریری طور پر اعتراض کی درخواست موجود ہے لیکن میں اسے دائر نہیں کرنا چاہتا۔‘
ان کا کہنا تھا کہ ’عدالت کوئی نئی تاریخ نہ دے اور اس نکتے پر غور کرے۔‘
اسلام آباد ہائی کورٹ نے کیس کی سماعت ملتوی کر دی اور اس پر مزید غور کرنے کی ہدایت کردی۔
کیس کی مزید سماعت کی تاریخ بعد میں مقرر کی جائے گی۔