ایف آئی اے کی بڑی کارروائیاں، انسانی اسمگلنگ میں ملوث اشتہاری ملزم گرفتار

اسلام آباد(سب نیوز)ایف آئی اے اسلام آباد زون کی بڑی کاروائیاں،شہریوں کو سمندر کے راستے غیر قانونی طور پر یورپ بھجوانے میں ملوث اشتہاری ملزم کو گرفتار کر لیا گیا۔
ترجمان ایف آئی اے کے مطابق ملزم کی شناخت حسن بٹ کے نام سے ہوئی ،اشتہاری ملزم شہریوں کو غیر قانونی سمندر کے راستے لیبیا بھجوانے میں ملوث ہے۔ملزم پولیس کا سابقہ ملازم ہے۔ملزم کو چھاپہ مار کارروائی میں جلال پور جٹاں سے گرفتار کیا گیا ۔
ملزم نے شہریوں کو ترکی سے یورپ بھجوانے کے لیے لاکھوں روپے وصول کیے ۔اشتہاری ملزم کی گرفتاری کے لئے متعدد بار چھاپے مارے گئے۔ ملزم سال 2022 سے اسلام آباد زون کو مطلوب تھا۔
ترجمان ایف آئی اے کے مطابق ملزم کے خلاف اینٹی ہیومن ٹریفکنگ سرکل اسلام آباد میں سال 2022 میں مقدمہ درج ہوا تھا ،
ملزم کو گرفتار کر کے تفتیش کا آغاز کر دیا گیا ہے ،ملزم کی نشاندہی پر مزید گرفتاریاں متوقع ہیں ۔
یونان کشتی حادثے میں ملوث ملزمان کی گرفتاری کے لئے خصوصی چھاپہ مار ٹیمیں تشکیل دی گئی ہیں۔
ملزمان کی گرفتاری کے لئے تمام تر وسائل کو بروئے کار لایا جا رہا ہے۔