دمشق (آئی پی ایس )شام میں مسلح افراد نے ایران کے سفارت خانے پر حملہ کرکے توڑ پھوڑ کی اور املاک کو نقصان پہنچایا۔ایرانی خبر رساں ادارے کے مطابق شام میں مسلح گروہوں نے دمشق میں واقع سفارت خانے پر دھاوا بول دیا اور لوٹ مار کی۔
العربیہ نیوز کی جانب سے جاری فوٹیجز میں دیکھا جا سکتا ہے کہ شامی دارالحکومت میں واقع ایرانی سفارت خانے کی عمارت اور املاک کو نقصان پہنچایا جا رہا ہے۔یہ واقعہ اس وقت پیش آیا جب شامی فوج کی کمان نے ایک بیان میں افسران کو مطلع کیا کہ صدر بشار الاسد کی حکومت گر گئی۔شامی فوج کے دو ذرائع نے رائٹرز سے گفتگو میں تصدیق کی کہ حیات تحریر الشام کی قیادت میں مسلح گروپ دارالحکومت دمشق میں داخل ہوگئے ہیں۔جس کے بعد صدر بشار الاسد ملک سے نامعلوم مقام کی جانب طیارے میں فرار ہوگئے۔
