آسٹریلیا پاکستان کی پائیدار معاشی ، معاشرتی ترقی کیلئے پرعزم ہے، نیل ہاکنز

پاکستان میں تعینات آسٹریلوی ہائی کمشنر نیل ہاکنز نے کہا ہے کہ موسمیاتی تبدیلی سے لاحق مہلک خطرات سکیورٹی کی روایتی سمجھ کو تبدیل کر دیں گے۔ وہ سینٹر فار ایرواسپیس اینڈ سکیورٹی اسٹڈیزکے منعقد کردہ سفارتی لیکچر سیریز بموضوع آسٹریلیا بدلتا ہوا بین الاقوامی منظر نامہ اور پاکستان سے تعلقات سے خطاب کر رہے تھے ۔
ہائی کمشنر نے کہا کہ پاکستان اپنے جغرافیے، ممکنہ معاشی استعداد، تضویراتی محل و قوع کے باعث آسٹریلیا کے لیے انتہائی اہمیت کا حامل ہے، آسٹریلیا پاکستان کی پائیدار معاشی اور معاشرتی ترقی کیلئے پرعزم ہے اور ہر ممکن تعاون کے لیے تیار ہے۔انھوں نے سیلاب سے متاثرہ علاقوں کی دادرسی کے لیے اٹھائے جانے والے حکومتی اقدامات اور مسلح افواج کی کاوشوں کو سراہا۔ انہوں نے آسٹریلوی حکومت کی جانب سے دی جانے والی پچاس لاکھ ڈالر کی امداد کا بھی ذکر کیا۔انہوں نے اس پہلو پر زور ڈالا کہ موسمیاتی تبدیلی ایک عالمی مسئلہ ہے اور ضروری ہے کہ تمام ممالک اپنے سیاسی اختلافات کو بالائے طاق رکھتے ہوئے اس مسئلے کا عملی اور پائیدار حل تلاش کریں۔انہوں نے دیگر علاقائی اور بین الاقوامی سیاسی اور تزویراتی معامالت پر بھی اپنی رائے کا اظہار کیا۔
پاکستان کے سابق سفیر اور CASS کے مشیر برائے خارجہ امور، جلیل عباس جیلانی نے لیکچر میں ناظم کا کردار ادا کیا۔ لیکچر کے بعد شرکا نے سوال جواب کے دور میں حصہ لیا۔ لیکچر میں اکیڈیمیا اور تھنک ٹینکس کے شرکا شامل تھے۔تقریب کے اختتام پر پریذیڈنٹ CASS ایئر مارشل ریٹائرڈ فرحت حسین خان نے مہمان سپیکر کا شکریہ ادا کیا اور امید کا اظہار کیا کہ پاکستان اور آسٹریلیا اپنے باہمی تعلقات کو مزید مضبوط کریں گے اور بین الاقوامی امن و سلامتی کے لئے مل کر اپنا کردار ادا کریں گے۔