سی ڈی اے نے مارگلہ ہلز پر واقع ٹریل ون اور ٹو کو عوام کے لئے کھول دیا

سی ڈی اے انتظامیہ شہریوں کو صحت مندانہ سہولیات کی فراہمی کے لئے دن رات مصروف عمل ہے۔ اس ضمن میں سی ڈی اے انتظامیہ کی ہدایت پر انوائرنمنٹ ونگ نے مارگلہ ہلز پر واقع ٹریل ون اور ٹو کا بحالیاتی کام مکمل کرکے عوام الناس کے لئے کھول دیا ہے۔متعلقہ شعبہ جات کی جانب سے ٹریل نمبر ایک کی مکمل صفائی اور بحالیاتی کے کا موں کی تکمیل اور دیگر ضروری سہولیات کی فراہمی کو یقینی بنایا گیا ہے۔ ٹریل ٹو پر بحالی کا کام بھی تقریبا مکمل کیا جا چکا ہے ۔ مزید برآں عوام الناس کی رہنمائی کے لئے ٹریلز پر سائن بورڈ اور نقشہ بھی آویزاں کردیا گیا ہے۔ جبکہ ٹریل نمبر ون کا سائن بورڈ اور رہنمائی میپ بھی جلد ہی آویزاں کردیا جائے گا۔علاوہ ازیں ٹریل نمبر ون کا راستہ دامن کوہ مین روڈ تا پلے لینڈ جبکہ ٹریل نمبر ٹو کا راستہ پلے لینڈ کے دائیں جانب سے دامن کوہ منکی پوائنٹ اور دوسرا راستہ دامن کوہ پارکنگ تک ہے۔واضح رہے ٹریل نمبر ون اور ٹو جو عرصہ دراز سے غیر فعال تھے کو سی ڈی اے انتظامیہ کی خصوصی دلچسپی کے باعث عوام الناس کے لئے کھول دیا گیا ہے۔ اسی طرح دونوں ٹریلز پر مائلز سٹون، پوائنٹ بورڈز، بینچز سمیت دیگر سہولیات کی فراہمی کو بھی یقینی بنایا جارہا ہے۔ ٹریل نمبر ون کی لمبائی تقریبا تین کلومیٹر پر مشتمل ہے جبکہ ٹریل نمبر ٹو کی کل لمبائی ڈھائی کلومیٹر پر مشتمل ہے۔اس موقع پر کپیٹل ڈیولپمنٹ اتھارٹی کی انتظامیہ کا کہنا ہے کہ شہریوں کو صحت مند سہولیات کی فراہمی ادارے کی اولین ترجیحات میں شامل ہے۔