لاہور(مانیٹرنگ ڈیسک )گورنر پنجاب عمر سرفراز چیمہ نے اپنے پرنسپل سیکریٹری کی طرف سے خط لکھنے کے معاملے پر انہیں ہٹانے کے لیے چیف سیکریٹری کو خط لکھ دیا۔تفصیلات کے مطابق پنجاب کے گورنر عمر سرفراز چیمہ نے پرنسپل سیکریٹری راشد منصور کے خط لکھنے کی تحقیقات کا حکم بھی دے دیا۔پرنسپل سیکریٹری راشد منصور کی جگہ اسپیشل سیکریٹری عمر سعید کو اضافی چارج دے دیا گیا ہے۔
گورنر کا اعتراض ہے کہ پرنسپل سیکریٹری کس طرح گورنر کو دباو میں لا سکتے ہیں، پرنسپل سیکریٹری از خود کیسے خط لکھ سکتے ہیں۔گورنر پنجاب نے پرنسپل سیکریٹری کے خطوط منظرِ عام پر آنے کے بعد معاملے کی انکوائری کی۔گورنر نے اس بات کی تحقیقات کا حکم دیا کہ پرنسپل سیکریٹری کی خفیہ خط و کتابت میڈیا تک کیسے پہنچی۔پرنسپل سیکریٹری راشد منصور نے گورنر عمر سرفراز چیمہ کو 2 خطوط لکھے تھے۔پہلے خط میں گورنر پنجاب کو حمزہ شہباز سے حلف لینے کا کہا گیا تھا، جبکہ دوسرے خط میں گورنر کو موصول ہونے والی سیکریٹری اسمبلی کی رپورٹ کو ازخود مسترد کیا گیا تھا۔
