عمران خان کی ناروے کے وزیراعظم کو پاکستان کے دورے کی دعوت

وزیراعظم عمران خان نے کہاکہ پاکستان اور ناروے کے درمیان سیاسی ، اقتصادی اور دیگر باہمی مفاد کے شعبہ جات میں تعلقات بڑھانے کے امکانات موجود ہیں۔وزیراعظم عمران خان سے بدھ کو یہاں ناروے کے سفیر پر البرٹ الساس نے ملاقات کی ، اس موقع پر وزیراعظم نے کہا کہ پاکستان اور ناروے کے درمیان بہترین تعلقات ہیں ، پاکستانی نژاد ناروے کے رہائشی دونوں ممالک کے درمیان ایک مضبوط پل کی حیثیت رکھتے ہیں ۔ وزیراعظم نے کہاکہ دونوں ملکوں کے درمیان سیاسی ، اقتصادی اور دیگر باہمی مفاد کے شعبہ جات میں تعلقات بڑھانے کے امکانات موجود ہیں ۔ ناروے کی موبائل فون کمپنی ٹیلی نار کا حوالہ دیتے ہوئے وزیراعظم نے کہاکہ دونوں ملکوں کے درمیان اقتصادی تعلقات بڑھ رہے ہیں ۔ ناروے کے سفیر نے وزیراعظم عمران خان کو ناروے کے عوام کی جانب سے مبارکباد پیش کی ۔ انہوں نے وزیراعظم کو اسلامی تعاون تنظیم کونسل کے وزرائے خارجہ کے 70ویں غیر معمولی اجلاس کے کامیابی سے انعقاد پر بھی مبارکباد دی ۔ وزیراعظم نے ناروے کے وزیراعظم کو جلد پاکستان کے دورے کی دعوت دی ۔