اسلام آباد (سب نیوز)پاکستان انٹرنیشنل ہیومن رائٹس آرگنائزیشن (پی آئی ایچ آر او) اور قائداعظم یونیورسٹی اسلام آباد کے درمیان تعلیمی تعاون، طلبہ کی سہولت، مشاورت اور علمی سرگرمیوں کے فروغ کے لیے مفاہمتی یادداشت (ایم او یو) پر دستخط کیے گئے ہیں۔
اس سلسلے میں قائداعظم یونیورسٹی کی نمائندگی وائس چانسلر پروفیسر ڈاکٹر ظفر نواز جسپال نے کی، جبکہ پی آئی ایچ آر او کی جانب سے چیئرمین حبیب ملک اورکزئی نے مفاہمتی یادداشت پر دستخط کیے۔
اس شراکت داری کا مقصد دونوں اداروں کے درمیان ادارہ جاتی تعاون کو فروغ دینا، طلبہ کے لیے سہولیات اور مواقع پیدا کرنا، باہمی مشاورت کو وسعت دینا اور تعلیمی و علمی سرگرمیوں میں مشترکہ اقدامات کی حوصلہ افزائی کرنا ہے۔
مفاہمتی یادداشت کے تحت دونوں ادارے علم کے تبادلے اور مشترکہ اقدامات کے ذریعے طلبہ کی تعلیمی و پیشہ ورانہ ترقی کے لیے نئے مواقع پیدا کرنے کے خواہاں ہیں۔ اس تعاون سے نوجوانوں کی صلاحیتوں کو اجاگر کرنے اور انہیں معاشرے کی مثبت ترقی میں مؤثر کردار ادا کرنے کے قابل بنانے میں مدد ملے گی۔
پی آئی ایچ آر او اور قائداعظم یونیورسٹی کے اس اشتراک کا مقصد تعلیم کے فروغ کے ساتھ انسانی حقوق کے شعور کو اجاگر کرنا اور نوجوان نسل کو بااختیار بنانے کے لیے مشترکہ کوششوں کو آگے بڑھانا ہے۔
دونوں اداروں نے اس عزم کا اظہار کیا کہ تعلیمی تعاون، طلبہ کی ترقی اور علم و آگاہی کے فروغ کے ذریعے ایک زیادہ تعلیم یافتہ، باشعور اور جامع معاشرے کی تشکیل میں اپنا کردار ادا کیا جائے گا۔
یہ مفاہمت پاکستان میں نوجوانوں کو بااختیار بنانے، انسانی حقوق کے تحفظ اور معیاری تعلیم کے فروغ کے لیے ادارہ جاتی تعاون کی جانب ایک اہم قدم ہے۔
